इजरायलले इरानको जेललाई निशाना बनाएर फेरि गर्यो आक्रमण

एजेन्सी । इजरायलले इरानको इभिन जेल र बासिज मुख्यालयमा फेरिआक्रमण गरेको बताएको छ । इरानले आक्रमणको पुष्टि गरेको छ ।

यसअघि इजरायलका रक्षामन्त्री इजरायल काट्जले एक बयान दिएका थिए भने उनले तेहरानमा इरानी शासनका केही लक्ष्यहरू सूचीबद्ध गरेका थिए, जसमा उनले हवाई आक्रमण गरिएको बताएका थिए ।

उनले भनेका छन्, ती लक्ष्यहरूमा बासिज फोर्सको मुख्यालय पनि समावेश छ । बासिजको पहिलो काम देश भित्र सरकार विरोधी गतिविधिहरूसँग व्यवहार गर्नु हो ।

काट्जले भनेका छन्, ‘एभिन जेललाई निशाना बनाइएको थियो, जहाँ राजनीतिक कैदीहरू र शासनका शत्रुहरू राखिन्छन् ।’ बीबीसी भेरिफाइले जेलको प्रवेशद्वारमा विस्फोट भएको देखाउने सीसीटीभी फुटेज पुष्टि गरेको छ ।

इरानको न्यायपालिकाले तेहरानको इभिन जेलमा आक्रमणको पुष्टि गरेको छ । मिसाइल जेलमा खसेको र जेलको केही भागमा क्षति पुगेको बताएको छ ।

रूसी राष्ट्रपति पुटिन र इरानका विदेशमन्त्री अराघचीबीच भेटवार्ता

रूसी राष्ट्रपति भ्लादिमिर पुटिन र इरानका विदेशमन्त्री अब्बास अराघचीबीच क्रेमलिनमा भेटवार्ता भएको छ । रुसको सरकारी समाचार च्यानलमा भ्लादिमिर पुटिनले भने, ‘यो इरानविरुद्ध पूर्णतया अकारण गरिएको आक्रमण हो, जसको कुनै आधार छैन र कुनै वैध कारण छैन ।’

पुटिनले भने, ‘म धेरै खुसी छु कि तपाईं (अब्बास अराघची) आज मस्कोमा हुनुहुन्छ, यसले हामीलाई यी सबै कठिन मुद्दाहरूमा छलफल गर्ने र आजको परिस्थितिबाट कसरी बाहिर निस्कने भन्ने बारेमा सँगै सोच्ने अवसर दिनेछ ।’

इरानका विदेशमन्त्रीले भने कि उनको देशको रुससँग धेरै नजिकको र मैत्रीपूर्ण सम्बन्ध छ, यी सम्बन्धहरूले अब रणनीतिक रूप लिएका छन् । अराघचीले भने, ‘इजरायल र अमेरिकाले गरेको आक्रमणले अन्तर्राष्ट्रिय नियम र मान्यताहरूको उल्लंघन गरेको छ ।’

यस वर्षको सुरुमा, रुसी राष्ट्रपति पुटिन र इरानी राष्ट्रपति मसूद पेजेश्कियान बीच रणनीतिक साझेदारी सम्झौतामा पनि हस्ताक्षर भएको थियो । सम्झौताले सुरक्षा सहयोग बढाउन आह्वान गर्दछ । तर, यो सैन्य गठबन्धन होइन र यसले रूसलाई तेहरानको सुरक्षा गर्न बाध्य पार्दैन ।