अर्जेन्टिनालाई इजिप्टको चुनौती

कोलम्बिया र स्विट्जरल्यान्ड पनि क्वार्टरफाइनल दौडमा

अर्जेन्टिनाले अन्तिम ३२ को खेलमा प्रतियोगिताको नयाँ टोली केप भर्डेमाथि अपेक्षाभन्दा निकै कठिन जित निकाल्यो । यसका बाबजुद, हाल अर्जेन्टिना लगातार ८ खेलमा विजयी हुँदै उत्कृष्ट लयमा छ । यस अवधिमा टोलीले प्रत्येक जितमा कम्तीमा २ गोल गरेको छ

काठमाडौँ । फिफा विश्वकप फुटबल २०२६ को नकआउट चरण झन् रोमाञ्चक बन्दै गएको छ । अन्तिम १६ अन्तर्गत नेपाली समयअनुसार मंगलबार राति र बुधबार बिहान हुने २ महŒवपूर्ण खेलमा साविक विजेता अर्जेन्टिनाले इजिप्टको चुनौती सामना गर्नेछ भने अर्को खेलमा स्विट्जरल्यान्ड र कोलम्बिया क्वार्टरफाइनल प्रवेशका लागि प्रतिस्पर्धा गर्नेछन् । फुटबल समर्थकहरूको विशेष ध्यान अर्जेन्टिना र इजिप्टबीच हुने खेलमा केन्द्रित छ, जहाँ विश्व फुटबलका २ महान स्टार लियोनेल मेसी र मोहम्मद सलाह आमनेसामने हुनेछन् ।

अमेरिकाको एटलान्टास्थित मर्सिडिज–बेन्ज स्टेडियममा हुने अर्जेन्टिना र इजिप्टबीचको खेललाई यस चरणकै सबैभन्दा आकर्षक प्रतिस्पर्धाका रूपमा हेरिएको छ । एकातर्फ साविक विश्वविजेता अर्जेन्टिना उपाधि रक्षा अभियानलाई निरन्तरता दिन चाहन्छ भने अर्कोतर्फ इजिप्ट इतिहास रच्दै पहिलोपटक विश्वकपको क्वार्टरफाइनल पुग्ने लक्ष्यमा छ । अर्जेन्टिनाले अन्तिम ३२ को खेलमा प्रतियोगिताको नयाँ टोली केप भर्डेमाथि अपेक्षाभन्दा निकै कठिन जित निकाल्यो । खेलमा अर्जेन्टिनाले २ पटक अग्रता बनाए पनि केप भर्डेले दुवै पटक बराबरी गर्दै खेललाई अतिरिक्त समयमा पुर्याएको थियो । अतिरिक्त समयको १११औँ मिनेटमा डियोनी बोर्जेसबाट भएको आत्मघाती गोल अर्जेन्टिनाका लागि निर्णायक बन्यो र टोली कठिन संघर्षपछि अन्तिम १६ मा प्रवेश गर्न सफल भयो ।

खेलभर केप भर्डेले अर्जेन्टिनाको पोस्टमा १६ पटक प्रहार गर्दै साविक विजेतामाथि ठुलो दबाब सिर्जना गरेको थियो । यद्यपि अनुभव र संयमताका कारण अर्जेन्टिनाले अन्ततः जित हात पार्न सफल भयो । विश्वकप इतिहासमा अतिरिक्त समयमा उत्कृष्ट प्रदर्शन गर्ने टोलीमध्ये अर्जेन्टिना अग्रस्थानमा रहँदै आएको छ । अतिरिक्त समयमा पुगेका १२ खेलमध्ये उसले १० खेल जितेको तथ्यांकले पनि त्यसलाई पुष्टि गर्छ । हाल अर्जेन्टिना लगातार ८ खेलमा विजयी हुँदै उत्कृष्ट लयमा छ । यस अवधिमा टोलीले प्रत्येक जितमा कम्तीमा २ गोल गरेको छ । उत्तर अमेरिकामा जारी प्रतियोगितामा पनि अर्जेन्टिनाले ४ खेलमा ११ गोल गर्दै आफ्नो आक्रामक शक्ति प्रदर्शन गरिसकेको छ । यदि इजिप्टलाई पराजित गर्न सफल भएमा अर्जेन्टिनाले क्वार्टरफाइनलमा स्विट्जरल्यान्ड वा कोलम्बियामध्ये एकसँग प्रतिस्पर्धा गर्नेछ ।

विश्वकपको अन्तिम १६ चरणमा अर्जेन्टिनाको इतिहास पनि प्रभावशाली छ । पछिल्ला ९ खेलमध्ये ७ खेल जितेको अर्जेन्टिनाले केवल सन् १९९४ र २०१८ मा मात्र यस चरण पार गर्न सकेको थिएन । त्यसैले टोली उच्च आत्मविश्वासका साथ मैदान उत्रने अपेक्षा गरिएको छ । यता इजिप्टले भने यस संस्करणमा ऐतिहासिक उपलब्धि हासिल गरेको छ । ९२ वर्षपछि पहिलोपटक विश्वकपको अन्तिम १६ मा स्थान बनाएको इजिप्टले यसअघि सन् १९३४ मा विश्वकप खेलेको थियो, तर त्यसबेला प्रतियोगिताको स्वरूप फरक थियो । यसपटक भने समूह चरण पार गर्दै नकआउटमा पुग्नु आफैँमा ठुलो उपलब्धि मानिएको छ । अन्तिम ३२ को खेलमा इजिप्टले अस्ट्रेलियालाई पेनाल्टी सुटआउटमा पराजित गर्दै अर्को इतिहास रच्यो । निर्धारित समय र अतिरिक्त समय बराबरीमा सकिएपछि भएको पेनाल्टीमा इजिप्टका सबै खेलाडी सफल भए ।

कप्तान मोहम्मद सलाहले अत्यन्तै आत्मविश्वासका साथ पनेन्का शैलीमा पेनाल्टी गोल गर्दै टोलीलाई अग्रता दिलाएका थिए । अस्ट्रेलियाका ह्यारी साउटर र लुकास हेयरिङ्टनले पेनाल्टी गुमाएपछि इजिप्ट विजयी बन्न सफल भयो । खेलपछि सलाह भावुक बनेका थिए । उनको आँखाको आँसुले यो उपलब्धि इजिप्टका लागि कति महŒवपूर्ण थियो भन्ने स्पष्ट देखाएको थियो । अब भने इजिप्टलाई अर्को कठिन चुनौतीको सामना गर्नुपर्नेछ । साविक विश्वविजेता अर्जेन्टिनाविरुद्ध सफल हुन टोलीले विशेषगरी आफ्नो रक्षापंक्तिमा सुधार गर्नुपर्ने देखिन्छ । किनभने इजिप्टले पछिल्ला लगातार ६ खेलमा गोल खाएको छ । अर्जेन्टिना र इजिप्टबीच हालसम्म केवल एकपटक मात्र भेट भएको छ । सन् २००८ मा भएको मैत्रीपूर्ण खेलमा अर्जेन्टिनाले इजिप्टलाई २–० ले पराजित गरेको थियो । त्यस खेलमा सर्जियो अगुएरो र निकोलस बुरडिसोले गोल गरेका थिए भने लियोनेल मेसी चोटका कारण अनुपस्थित थिए । यसपटक भने मेसी पूर्णरूपमा फिट रहेको र सलाहसँगको प्रत्यक्ष प्रतिस्पर्धाका लागि तयार रहेको बताइएको छ ।

अर्जेन्टिनाको टोलीमा केही खेलाडीको फिटनेसलाई लिएर चिन्ता देखिएको छ । केप भर्डेविरुद्धको कठिन खेलपछि नाहुएल मोलिना, एन्जो फर्नान्डेज र फाकुन्डो मेडिनाले पूर्ण अभ्यास गर्न सकेका छैनन् । मेडिनाको समस्या सामान्य मांसपेशी दुःखाइ भएको बताइएको छ । आवश्यक परे निकोलस टालियाफिकोले उनको स्थान लिन सक्छन् । अर्का विंगर निको गोन्जालेजको एंकलमा समस्या देखिएकाले उनको खेल्ने सम्भावना पनि निश्चित छैन । लियोनेल मेसीले भने अर्को ऐतिहासिक कीर्तिमान आफ्नो नाममा लेखाइसकेका छन् । अन्तिम ३२ को खेलमा गोल गरेसँगै उनी दुई फरक विश्वकपमा ७–७ गोल गर्ने पहिलो खेलाडी बने । साथै विश्वकपको नकआउट चरणमा सबैभन्दा धेरै १२ गोलमा प्रत्यक्ष योगदान दिने खेलाडीको कीर्तिमान पनि उनले बनाएका छन् ।

इजिप्टको टोलीमा पनि केही प्रमुख खेलाडी चोटका कारण अनिश्चित छन् । लेफ्ट ब्याक करिम हाफेज अस्ट्रेलियाविरुद्धको खेलमा ८०औँ मिनेटमा मैदान छाडेका थिए । उनको अवस्थाबारे विभिन्न रिपोर्ट आएका छन् । केहीले सामान्य थकान भनेका छन् भने केहीले ह्यामस्ट्रिङमा समस्या रहेको बताएका छन् । यदि उनी खेल्न नसके अर्जेन्टिनाका कप्तान मेसीलाई रोक्न इजिप्टलाई ठुलो कठिनाइ हुनेछ । अर्का डिफेन्डर मोहम्मद अब्देलमोनेम पनि एंकलको चोटका कारण अझै पूर्ण रूपमा फिट छैनन् । यद्यपि निलम्बनपछि मिडफिल्डर मोहानाद लाशिन पुनः टोलीमा फर्किनेछन् ।

यसैबीच, विश्वकपको अर्को अन्तिम १६ खेलमा बुधबार बिहान १ः४५ बजे स्विट्जरल्यान्ड र कोलम्बिया आमनेसामने हुँदै छन् । क्यानडाको भ्यानकुभरस्थित बिसी प्लेसमा हुने यो खेल पनि निकै प्रतिस्पर्धात्मक हुने अपेक्षा गरिएको छ । स्विट्जरल्यान्डले प्रतियोगिताको सुरुआत कतारसँग १–१ को बराबरीबाट गरेको थियो । तर त्यसपछि टोलीले उत्कृष्ट पुनरागमन गर्दै लगातार ३ खेल जितेको छ । समूह चरणमा बोस्निया–हर्जेगोभिनामाथि ४–१ को प्रभावशाली जित निकालेपछि स्विट्जरल्यान्डले आयोजक क्यानडालाई २–१ ले पराजित गर्दै समूह विजेता बनेको थियो । अन्तिम ३२ को खेलमा स्विट्जरल्यान्डले अल्जेरियालाई २–० ले हरायो । युवा मिडफिल्डर जोहान मान्जाम्बीले ब्रिल एम्बोलोलाई गोलका लागि उत्कृष्ट पास उपलब्ध गराउँदै टोलीको जितमा महŒवपूर्ण भूमिका खेले । प्रशिक्षक मुराट याकिनले युवा खेलाडीहरूलाई दिएको अवसर सफल सावित भएको छ ।

यद्यपि स्विट्जरल्यान्डका लागि केही चोटका समस्या पनि छन् । मिडफिल्डर मिसेल एबिस्चर मांसपेशीको समस्याबाट पूर्ण रूपमा निको भइसकेका छैनन् । डिफेन्डर लुका जाक्वेज पनि चोटकै कारण टोलीसँग नियमित अभ्यास गर्न सकेका छैनन् । उनीहरू अनुपस्थित भए ग्रानिट झाका र रेमो फ्रयुलरले मिडफिल्ड सम्हाल्ने अपेक्षा गरिएको छ भने म्यानुएल आकान्जी र निको एल्भेडीले रक्षापंक्ति नेतृत्व गर्नेछन् । कोलम्बियाले भने यस विश्वकपमा निकै प्रभावशाली प्रदर्शन गरेको छ । पछिल्ला ६ खेलमध्ये ५ खेल जितेको टोली एक खेलमा मात्र बराबरीमा रोकिएको छ । समूह चरणको अन्तिम खेलमा पोर्चुगलसँग गोलरहित बराबरी खेले पनि त्यस खेलमा अतिरिक्त समयमा गरेको गोल अफसाइड भएपछि कोलम्बिया जितबाट वञ्चित भएको थियो ।

अन्तिम ३२ मा घानामाथि १–० को जित निकाल्दै कोलम्बिया क्वार्टरफाइनल नजिक पुगेको हो । खेलको सुरुमै स्ट्राइकर जोन कोर्डोबा घाइते भएपछि टोलीलाई झट्का लागेको थियो । उनको ह्यामस्ट्रिङमा गम्भीर चोट लागेकाले बाँकी विश्वकप गुमाउने निश्चित भएको छ । उनको स्थानमा मैदान प्रवेश गरेका लुइस सुआरेजले निर्णायक गोलका लागि सहयोग गर्दै टोलीलाई जित दिलाएका थिए । त्यसैले स्विट्जरल्यान्डविरुद्ध पनि उनी सुरुआती टोलीमा रहने सम्भावना बलियो छ । कोलम्बियाको अर्को ठुलो बलियो पक्ष भनेको उसको रक्षापंक्ति हो । टोलीले पछिल्ला ३ खेलमा लगातार क्लिनसिट राखेको छ । यस विश्वकपमा उसले केवल १ गोल मात्र खाएको छ, जुन प्रतियोगिताको पहिलो खेलमा उज्बेकिस्तानविरुद्ध आएको थियो ।

विश्लेषकहरूको अनुमानअनुसार अर्जेन्टिनाले इजिप्टलाई ३–१ ले पराजित गर्दै क्वार्टरफाइनलमा स्थान बनाउन सक्ने सम्भावना बढी देखिएको छ । इजिप्टले केही चुनौती प्रस्तुत गरे पनि अर्जेन्टिनाको आक्रमण र अनुभव निर्णायक बन्न सक्ने अपेक्षा गरिएको छ । त्यसैगरी स्विट्जरल्यान्ड र कोलम्बियाबीचको खेल निकै प्रतिस्पर्धात्मक हुने अनुमान गरिएको छ । तर कोलम्बियाको सन्तुलित प्रदर्शन, उत्कृष्ट रक्षापंक्ति र लुइस डियाजको आक्रमणकारी क्षमता निर्णायक बन्न सक्ने भएकाले कोलम्बिया २–१ को झिनो अन्तरले विजयी हुँदै अन्तिम ८ मा पुग्ने सम्भावना व्यक्त गरिएको छ । यसरी विश्वकप २०२६ को नकआउट चरणमा मंगलबार हुने यी दुवै खेलले प्रतियोगिताको आगामी यात्राको दिशा तय गर्नेछन् । फुटबल समर्थकहरू मेसी र सलाहको बहुप्रतीक्षित भिडन्तसँगै स्विट्जरल्यान्ड र कोलम्बियाबीचको रोमाञ्चक प्रतिस्पर्धाको प्रतीक्षामा रहेका छन् । यी २ बीचको खेलसँगै विश्वकपमा अन्तिम १६ का खेल सकिनेछन् ।

०००

छोटो विश्राम र फिटनेस समस्याले अर्जेन्टिना चिन्तित, स्कालोनी असन्तुष्ट

अर्जेन्टिनाका मुख्य प्रशिक्षक लियोनल स्कालोनीले जारी विश्वकपको खेल तालिकाप्रति गम्भीर असन्तुष्टि व्यक्त गरेका छन् । केप भर्डविरुद्ध अतिरिक्त समयमा ३–२ को कठिन जित निकालेपछि उनले खेल तालिका अत्यधिक असन्तुलित रहेको भन्दै खेलाडीहरूको रिकभरी समयमै ध्यान नदिइएको गुनासो गरेका हुन् । डिफेन्डिङ च्याम्पियन अर्जेन्टिनाले उक्त रोमाञ्चक खेलमार्फत अन्तिम १६ मा स्थान सुरक्षित गरेको छ । तर अब टोलीले मंगलबार इजिप्टसँग प्रतिस्पर्धा गर्नुपर्नेछ । केप भर्डविरुद्ध १२० मिनेटसम्मको कडा खेल खेलेको अर्जेन्टिनालाई पुनः मैदानमा उत्रिन करिब साढे ३ दिन मात्र विश्राम पाएको छ । यसले टोलीको शारीरिक र मानसिक तयारीमा थप दबाब सिर्जना गरेको प्रशिक्षक स्कालोनीको भनाइ छ ।
त्यसमाथि मियामी क्षेत्रमा आएको आँधीका कारण शनिबार बिहान तय गरिएको प्रशिक्षण सत्रसमेत रद्द गर्नुपरेको थियो, जसले तयारीमा अझ अवरोध उत्पन्न गरेको बताइएको छ । खेलपछि सञ्चारकर्मीसँग कुरा गर्दै स्कालोनीले भने, ‘हामीलाई सुरुमा ६ दिनको विश्राम मिलेको थियो, तर त्यसपछि खेलहरू बीचको समय घट्दै गयो । अहिले त साढे ३ दिन मात्र विश्राम छ, जुन यस्तो उच्चस्तरको प्रतियोगितामा अत्यन्तै कठिन अवस्था हो । सबैभन्दा बढी रिकभरी आवश्यक पर्ने बेला कम समय दिनु बुझ्न गाह्रो छ ।’

विश्वकपको तालिका क्रमिक रूपमा सन्तुलित हुनुपर्ने भए पनि त्यसो नभएकोमा उनले आश्चर्यसमेत व्यक्त गरे । यद्यपि अब परिस्थितिलाई स्वीकार गर्दै अघि बढ्नुबाहेक विकल्प नभएको पनि उनले बताए । केप भर्डविरुद्धको खेल अर्जेन्टिनाका लागि निकै चुनौतीपूर्ण बनेको थियो । निर्धारित ९० मिनेटमा बराबरीमा सकिएपछि खेल अतिरिक्त समयमा पुगेको थियो, जहाँ अर्जेन्टिनाले ३–२ को जित निकाल्दै अन्तिम १६ मा स्थान पक्का गर्यो । स्कालोनीको यो प्रशिक्षकको रूपमा १००औँ खेल पनि थियो, जसलाई उनले कठिन जितसँगै स्मरणीय बनाए । कप्तान लियोनल मेसीले पनि खेलको शारीरिक कठिनाइबारे टिप्पणी गरेका छन् । उनले विपक्षी खेलाडीहरूको लगातार दबाबका बीच खेल्नुपरेको अनुभव सुनाउँदै खेलपछि दर्शकहरू जर्सी र सेल्फी माग्न आइपुग्ने अवस्थालाई रमाइलो शैलीमा उल्लेख गरेका थिए ।

तर छोटो विश्रामका कारण अर्जेन्टिना टोलीभित्र फिटनेस समस्या पनि देखिन थालेको छ । डिफेन्डर फाकुन्डो मेडिना मांसपेसी बाउँडिएर मैदान छाड्न बाध्य भए भने मिडफिल्डर एन्जो फर्नान्डेज पनि अन्तिम समयमा क्र्याम्पको समस्याबाट प्रभावित भए । अतिरिक्त समयमा निको गोन्जालेजको घुँडानजिकको भागमा चोट लागेपछि टोलीको मेडिकल विभाग चिन्तित बनेको छ । स्कालोनीले खेलाडीहरूको अवस्थाबारे बोल्दै एन्जो फर्नान्डेज सामान्य क्र्याम्पपछि ठिक रहेको बताए । फाकुन्डो मेडिनाले अट्याकिङ भूमिकामा अतिरिक्त मिहिनेत गर्नुपरेको र त्यसले उनलाई असर गरेको उनले उल्लेख गरे । साथै, टोलीका लागि निको टाग्लियाफिको बेन्चमा उपलब्ध हुनु ठुलो राहत भएको र उनी पूर्ण रूपमा तयार रहेको पनि प्रशिक्षकले स्पष्ट पारे ।

०००

हालान्डको २ गोलमा ब्राजिल स्तब्ध, इंग्ल्यान्डसँग नर्वेको क्वार्टरफाइनल भेट

एर्लिङ हालान्डको उत्कृष्ट प्रदर्शनमा नर्वेले ५ पटकको विश्वकप विजेता ब्राजिललाई २–१ ले पराजित गर्दै इतिहासमै पहिलोपटक फिफा विश्वकपको क्वार्टरफाइनलमा स्थान सुरक्षित गरेको छ । अन्तिम १६ अन्तर्गत नेपाली समयअनुसार सोमबार बिहान अमेरिकाको न्युयोर्कस्थित न्यू जर्सी स्टेडियममा भएको खेलमा हालान्डले दोस्रो हाफमा २ गोल गर्दै नर्वेलाई ऐतिहासिक जित दिलाए । खेलको सुरुआतदेखि नै दुवै टोलीले आक्रामक खेल प्रस्तुत गरेका थिए ।

चौथो मिनेटमै प्याट्रिक बर्गले गोल गरे पनि अफसाइडका कारण त्यसले मान्यता पाएन । पहिलो हाफमा ब्राजिलले अग्रता लिने उत्कृष्ट अवसर पाएको थियो । ब्रुनो गिमारेसले पाएको पेनाल्टी अवसरलाई नर्वेका गोलरक्षकले शानदार बचाउ गरेपछि खेल गोलरहित बराबरीमा रह्यो । दोस्रो हाफमा लामो समयसम्म दुवै टोलीले गोल गर्न नसके पनि ७९औँ मिनेटमा एन्ड्रियास स्केल्डेरुपको सटिक क्रसमा हालान्डले हेडमार्फत गोल गर्दै नर्वेलाई अग्रता दिलाए ।

त्यसपछि ९०औँ मिनेटमा उनले बक्स बाहिरबाट गरेको शक्तिशाली प्रहार गोलमा परिणत भएपछि नर्वे २–० ले अघि बढ्यो । हालान्डका दुवै गोलमा स्केल्डेरुपले नै असिस्ट गरेका थिए । इन्जुरी समयको १०औँ मिनेटमा ब्राजिलले दोस्रो पेनाल्टी पाएको थियो । लियो ओस्टिगार्डले कासेमिरोलाई फाउल गरेको निर्णयपछि प्राप्त अवसरलाई वैकल्पिक खेलाडी नेयमारले गोलमा परिणत गरे पनि त्यो केवल सान्त्वना गोलमा सीमित रह्यो । यससँगै ब्राजिल सन् १९९० यता पहिलो पटक विश्वकपको क्वार्टरफाइनल पुग्न असफल भएको छ ।

हालान्डले प्रतियोगितामा आफ्नो गोल संख्या बढाउँदै सर्वाधिक गोलकर्ताको दौडमा अर्जेन्टिनाका लियोनेल मेसी र फ्रान्सका किलियन एम्बाप्पेसँग बराबरी गरेका छन् । यता, अर्को अन्तिम १६ को खेलमा इंग्ल्यान्डले सह–आयोजक मेक्सिकोलाई ३–२ ले पराजित गर्दै अन्तिम ८ मा स्थान बनाएको छ । मेक्सिको सिटीस्थित एज्तेका स्टेडियममा भएको रोमाञ्चक खेलमा इंग्ल्यान्डले एक खेलाडी कम हुँदा पनि उत्कृष्ट रक्षात्मक प्रदर्शन गर्दै जित हात पारेको हो ।

जुड बेलिङघमले ३६औँ र ३८औँ मिनेटमा लगातार २ गोल गर्दै इंग्ल्याण्डलाई बलियो अग्रता दिलाएका थिए । पहिलो हाफको अन्त्यतिर जुलियन क्विनोनेसले मेक्सिकोका लागि १ गोल फर्काए । दोस्रो हाफको ५४औँ मिनेटमा डिफेन्डर जरेल क्वान्सा रातो कार्ड खाँदै मैदानबाट बाहिरिएपछि इंग्ल्यान्ड १० खेलाडीमा सीमित भयो । त्यसको केही मिनेटपछि कप्तान ह्यारी केनले पेनाल्टीमार्फत गोल गर्दै टोलीलाई ३–१ को अवस्थामा पुर्याए । ६९औँ मिनेटमा राउल जिमिनेजले पनि पेनाल्टीमा गोल गर्दै मेक्सिकोलाई खेलमा फर्काउने प्रयास गरे ।

खेलको अन्तिम समयमा मेक्सिकोले लगातार दबाब सिर्जना गरे पनि इंग्ल्यान्डका डिफेन्डर जोन स्टोन्स र ड्यान बर्नले मजबुत रक्षापंक्ति कायम राखे । गोलरक्षक जोर्डन पिकफोर्डले पनि महŒवपूर्ण बचाउ गर्दै टोलीको जित सुरक्षित गरे । अब क्वार्टरफाइनलमा इतिहास रच्दै पहिलोपटक अन्तिम ८ मा पुगेको नर्वेले जुलाई १२ मा इंग्ल्यान्डसँग प्रतिस्पर्धा गर्नेछ । दुवै टोली सेमिफाइनल यात्राका लागि आमनेसामने हुँदा विश्व फुटबलले अर्को रोमाञ्चक प्रतिस्पर्धा हेर्ने अपेक्षा गरिएको छ ।

०००

ट्रम्पको हस्तक्षेपपछि फिफाले फुकायो बालोगनको प्रतिबन्ध, चर्कियो विवाद

विश्वकप फुटबलमा अमेरिकी स्ट्राइकर फोलारिन बालोगनसँग सम्बन्धित ‘रेड कार्ड’ प्रकरणले ठूलो विवाद सिर्जना गरेको छ । बोस्निया र हर्जगोभिनाविरुद्धको अन्तिम ३२ को खेलमा उनलाई दिइएको रातो कार्डपछि सुरु भएको विवादले अन्ततः फिफाको निर्णयमै परिवर्तन ल्याएको बताइएको छ । खेलको क्रममा सुरुमा रेफ्री राफेल क्लाउसले कुनै गम्भीर फाउल नदेखे पनि भिडियो सहायक रेफ्री (भिएआर) को हस्तक्षेपपछि बालोगनलाई सिधै रातो कार्ड दिइएको थियो । सो निर्णयलाई धेरै फुटबल विश्लेषकहरूले अत्यधिक कठोर भएको भन्दै आलोचना गरेका थिए ।

बालोगन, जसले यस विश्वकपमा तीन गोल गरिसकेका छन्, अमेरिकी टोलीका प्रमुख खेलाडी मानिन्छन् । विवाद चर्किँदै जाँदा फिफाले आफ्नो अनुशासन संहिताको ‘धारा २७’ प्रयोग गर्दै प्रतिबन्धलाई अस्थायी रूपमा निलम्बन गरेको बताइएको छ । यस निर्णयपछि बालोगनले बेल्जियमविरुद्धको अन्तिम १६ को महत्वपूर्ण खेल खेल्न पाउने भएका थिए । फिफाको अनुसार, उक्त रातो कार्डलाई एक वर्षको प्रोबेसनमा राखिनेछ, जसअन्तर्गत भविष्यमा पुनः यस्तै घटना दोहोरिएमा मात्र प्रतिबन्ध लागू हुनेछ ।

यस घटनासँगै राजनीतिक हस्तक्षेपको चर्चा पनि चुलिएको छ । अमेरिकी राष्ट्रपति डोनाल्ड ट्रम्पले फिफाका अधिकारीहरूसँग सम्पर्क गरेर निर्णयमा प्रभाव पारेको भन्ने दाबी सार्वजनिक भएपछि विषय थप संवेदनशील बनेको हो । यद्यपि ह्वाइट हाउसले यस विषयमा आधिकारिक प्रतिक्रिया दिएको छैन । बेल्जियम फुटबल संघले भने फिफाको निर्णयप्रति कडा आपत्ति जनाउँदै यसलाई फेयर प्लेविरुद्धको कदम भनेको छ । उसले कानुनी विकल्पहरू खोज्ने चेतावनी समेत दिएको छ । यो प्रकरणले खेल मैदानभन्दा बाहिरको राजनीति र निर्णय प्रक्रियाले अन्तर्राष्ट्रिय फुटबल प्रतियोगिताको निष्पक्षतामाथि प्रश्न उठाएको छ ।