काठमाडौं आइपुगे शान्ति दूत ‘अलोका’सहित भिक्षुहरूको टोली

काठमाडौं । शान्ति, नैतिकता र सचेतनाको सन्देश फैलाउँदै विश्वका विभिन्न देशमा हजारौँ माइल पैदल यात्रा गरेका भियतनामी बौद्ध भिक्षु भन्ते पन्ना काराको नेतृत्वमा रहेको टोली सोमबार काठमाडौं आइपुगेको छ । टोलीसँग अन्तर्राष्ट्रिय शान्ति दूतका रूपमा परिचित ‘अलोका’ नामक कुकुर पनि रहेको छ ।

भारतमा ३४०० किलोमिटर तथा अमेरिकामा टेक्ससदेखि वासिङ्टनसम्म करिब ३७ सय किलोमिटर खाली खुट्टा शान्ति पदयात्रा सम्पन्न गरेको टोलीले युद्ध र हिंसाबाट प्रभावित विश्वमा शान्तिको सन्देश फैलाउने उद्देश्य राखेको जनाएको छ ।

काठमाडौं बसाइका क्रममा टोलीले बौद्ध, स्वयम्भू लगायतका बौद्ध तीर्थस्थलहरूको दर्शन गर्ने तथा राष्ट्रपति रामचन्द्र पौडेलसँग शिष्टाचार भेट गर्ने कार्यक्रम रहेको जनाएको छ ।

भन्ते पन्ना काराले बुद्धका शिक्षा, ध्यान र करुणाको अभ्यासमार्फत मानिसले आफ्नो अन्तरमनमै शान्ति खोज्न सक्ने बताउँदै काठमाडौंबाट पनि विश्व शान्तिको सन्देश प्रवाह गर्ने उद्देश्य रहेको उल्लेख गरेका छन् ।–तस्विर नेपाल फोटो लाइब्रेरी