गृहमन्त्री लेखकको राजीनामा माग्नु सान्दर्भिक छैन : प्रमुख सचेतक घिमिरे

काठमाडौं । नेपाली कांग्रेसका प्रमुख सचेतक श्यामकुमार घिमिरेले एक जना सहसचिवमाथि अख्तियार दुरुपयोग अनुसन्धान आयोगले छानबिन गरिरहेकाले सोही विषयलाई आधार बनाएर गृहमन्त्री रमेश लेखकको राजीनामा माग गर्नु सान्दर्भिक नहुने बताएका छन् ।

प्रतिनिधिसभाको आजको बैठकमा आकस्मिक समय लिएर उनले राष्ट्रिय स्वतन्त्र पार्टी (रास्वपा) को सभापतिमा अहिले पनि निर्वाचन आयोगको अभिलेखमा रवि लामिछाने भएको उल्लेख गर्दै पाँच–पाँच वटा मुद्दा अदालतमा चलिरहेका व्यक्ति सभापति हुन नमिल्ने बताए ।

‘रास्वपाको संसदीय दलको नेता परिवर्तन गर्नेसम्बन्धी कुनै खबर पनि नआएकाले संसद् सदस्य पदबाट निलम्बित हुनुभएका लामिछाने कसरी संसदीय दलको नेता हुन सक्नुहुन्छ ?’, उनले प्रश्न गरे ।

प्रतिनिधिसभाको आजको बैठक सुरू हुनासाथ रास्वपा र राष्ट्रिय प्रजातन्त्र पार्टी (राप्रपा) ले बैठक अवरोध गरेको थियो । गृहमन्त्री लेखककै विषय उठाउँदै रास्वपा र राप्रपाले आजको बैठक अवरोध गरेको हो । तर, दुई विपक्षी दलको अवरोधकै बीच सभामुख देवराज घिमिरेले प्रतिनिधिसभाको बैठक अघि बढाएका छन् । अहिले बैठक जारी छ ।