म्यानमारमा पुनः मुख्यालय कब्जा गरेको विद्रोहीहरूको दाबी

बैंकक । म्यानमारको एउटा जातीय विद्रोही समूहले मंगलबार म्यानमाको सेनाबाट आफ्नो मुख्यालय पुनः कब्जा गरेको बताएको छ । उक्त मुख्यालयबाट उक्त विद्रोही समूहलाई करिब ३० वर्षअघि बलपूर्वक निष्कासित गरिएको थियो ।

करेन नेसनल युनियन (केएनयु) का लडाकूहरूले केही दिनको लडाइँपछि थाई सीमामा रहेको मानेरप्लाव कब्जा गरेको केएनयुका नेता साव थामाइन टुनले बताए ।

‘म्यानमाका जुन्ता सैनिकहरू अझै पनि यसलाई फिर्ता लिन चाहन्छन् र उनीहरूले ड्रोन प्रयोग गरे र हाम्रो सेनामाथि बम प्रहार गर्ने प्रयास गरे’, उनले भने, ‘तर हाम्रा सेनाले आधार कब्जा गरिसकेका छन् ।’

वर्षौँसम्म केएनयुको करेन अल्पसंख्यकको अधिकारका लागि दशकौँ लामो सशस्त्र संघर्षको मुख्यालय थियो र त्यहाँ म्यानमाको तत्कालीन जुन्ताविरुद्ध अन्य विरोधी राजनीतिज्ञहरू पनि थिए ।

इसाई बहुल केएनयुभित्र विभाजन भएपछि जुन्ता र विभाजित बौद्ध गुटले सन् १९९५ मा आधार कब्जा गरे । यसबाट हजारौँ मानिस थाइल्याण्ड पलायन हुन बाध्य भए ।

मानेरप्लावको पतनपछि जुन्ताले कायिन राज्यको नाम परिवर्तन गरी एउटा सहयोगी सशस्त्र समूह, डेमोक्रेटिक कायिन बौद्ध संगठनलाई यसको जिम्मा दियो ।

सन् २०२१ मा पछिल्लो विद्रोहपछि केएनयुले वर्तमान जुन्तासँग बारम्बार झडप गरेको छ र सेनालाई अपदस्थ गर्न खोज्ने अन्य विरोधीहरूलाई आश्रय र प्रशिक्षण प्रदान गरेको छ ।

‘मानेरप्लाव करेनहरूका लागि एउटा ऐतिहासिक स्थान थियो’, साव थामाइन टुनले भने, ‘यहाँ करिब एक सय सैनिकलाई गाडिएको छ, हामीले सबैको सम्मान गर्न यस क्षेत्रलाई पुनर्निर्माण गर्नुपर्छ ।’

सन् २०२१ को सैन्य अध्यादेशपछि म्यानमा अशान्त छ । अध्यादेशले केएनयु जस्ता विद्रोही समूहहरूसँग नयाँ लडाइँ सुरु गर्यो र देशभरि सैन्य शासनविरुद्ध लड्ने धेरै लोकतान्त्रिक जनताको सुरक्षा बललाई जन्म दियो ।

संयुक्त राष्ट्रसंघका अनुसार लडाइँका कारण ३० लाखभन्दा बढी मानिस विस्थापित भएका छन् । द्वन्द्वले नियमित रूपमा थाइल्याण्डसँग म्यानमाको दुई हजार चार सय किलोमिटर सीमा पार गरेर हजारौँलाई पलायन गराउँछ ।– रासस, एएफपी