सियोल । दक्षिण कोरियाली पूर्वराष्ट्रपति युन सुक योललाई दुई पटकसम्म सोधपुछ गरेपछि फेरि सोधपुछका लागि भन्दै पक्राउ पुर्जी जारी गर्न आइतबार अभियोजनकर्ताले आग्रह गरेका छन् ।
गत वर्षको डिसेम्बर ३ मा संसदमा सशस्त्र सैनिक तैनाथ गरिएको नागरिक शासनलाई उल्ट्याउने प्रयास गरेको भन्दै सांसदहरूले महाभियोग र निलम्बन गरेपछि युनलाई अप्रिलमा औपचारिक रूपमा पदबाट हटाइएको थियो ।
उनी राज्य विद्रोहको अभियोगमा अदालतमा उपस्थित भएका छन् भने सैनिक कानुन (मार्शल ल) घोषणाको अनुसन्धान गरिरहेका एक विशेष वकिलले उनलाई सोधपुछ गरेका छन् ।
‘आज विशेष वकिलले सियोल सेन्ट्रल डिस्ट्रिक्ट कोर्टमा पूर्वराष्ट्रपति युन सुक योललाई शक्तिको दुरुपयोग र विशेष सरकारी कर्तव्यमा बाधा पु¥याएको अभियोगमा पक्राउ पुर्जी जारी गर्न अनुरोध गरेका छन्,’ विशेष वकिलमध्येका एक सदस्य (अभियोजक) पार्क जी–योङले भने ।
पार्कका अनुसार युनमाथि सैनिक शासनको घोषणालाई लिएर आधिकारिक कागजातमा मिथ्याकरण गरेको आरोप पनि लगाइएको छ । पार्कले भने, ‘पक्राउ पूर्जीमा पूर्व राष्ट्रपति युनलाई किन हिरासतमा राख्नु आवश्यक छ भन्ने उल्लेख गरिएको छ, तर म यहाँ विस्तृत विवरण दिन सक्दिनँ ।’
अभियोजकहरूले गत जनवरीमा पक्राउ प्रयास असफल हुँदा युनले गरेको प्रतिरोधका साथै उहाँले सैन्य कानुन घोषणा गर्नुको औचित्यका रुपमा ड्रोनलाई प्योङयाङ उड्न अनुमति दिएको आरोपबारे शनिबार प्रश्न उठाएको थियो । युनको कानुनी टोलीले उक्त पक्राउपूर्जी अत्यधिक र अवाञ्छित भन्दै आलोचना गरेको छ ।
उनको वकिल टोलीले जारी गरेको विज्ञप्तिमा भनिएको छ, ‘हामीले आरोपको पूर्ण रुपमा खण्डन गरेका छौं र कानूनको रूपमा कुनै पनि अपराध स्थापित गर्न सकिँदैन भन्ने प्रमाणित गरेका छौँ ।’
‘विशेष वकिलले अनुसन्धानका क्रममा कुनै वस्तुगत प्रमाण प्रस्तुत गर्न सकेनन् र साक्षीको बयानका आधारमा पनि आरोप टिक्न सक्दैन,’ उनीहरूले भने ।
गत हप्ता अदालतले विशेष वकीलले यूनले सुरुमा सोधपुछको लागि उपस्थित हुन इन्कार गरको तर उनले आवश्यक भएमा भविष्यमा उपस्थित हुने इच्छा व्यक्त गरेको भन्दै पक्राउका लागि अनुरोध गरेको पक्राउ पूर्जी खारेज गरिदिएको थियो ।
प्रतिक्रिया