कलंकीको रेस्टुरेन्टबाट लुटपाट गरेको आरोपमा असईसहित दुई जना प्रहरी पक्राउ

काठमाडौं । कलंकीको एक रेस्टुरेन्टबाट पुरानो छालाको पैसा लुटपाट गरेको आरोपमा प्रहरी सहायक निरीक्षक (असई) सहित दुई जना प्रहरी पक्राउ परेका छन् ।

पक्राउ पर्नेहरुमा असई अनबहादुर पुन र प्रहरी जवान धीर बुढा रहेका छन् । उनीहरुलाई काठमाडौं उपत्यका अपराध अनुसन्धान कार्यालयको टोलीले बुधबार पक्राउ गरेको जनाएको छ ।

पक्राउ परेकाहरुलाई अनुसन्धान गर्नका लागि बुधबार नै जिल्ला प्रहरी परिसर काठमाडौं बुझाइएको एक अधिकृतले जानकारी दिए । छालाको पैसा ल्याउने युवक र अर्का एक बिचौलिया भने अहिले फरार रहेको प्रहरीले जनाएको छ ।

उनीहरुले कलंकीस्थित एक रेस्टुरेन्टबाट पुरानो छालाको पैसा लुटपाट गरेको आरोप लागेको छ । अपराध अनुसन्धान कार्यालयमा दरबन्दी भई उनीहरु प्रहरी वृत्त कीर्तिपुरमा कार्यरत थिए ।