एचआइभी संक्रमितमा यौनरोग र क्षयरोग भेटियाे, ५४४ जनामा गरिएकाे थियाे परीक्षण

चितवन । जिल्लामा रहेका एचआइभी संक्रमितमा यौनरोग (भिरिंगी) र क्षयरोगको समस्या देखिने गरेको छ । यस वर्ष गरिएको एचआइभी संक्रमित भएकाहरुको परीक्षणका क्रममा भिरिंगी र क्षयरोग देखिएको हो ।

एड्स हेल्थ फाउन्डेसन बागमती प्रदेशका संयोजक कृष्णहरि सापकोटाका अनुसार यस वर्षको जनवरीयता ५४४ जना संक्रमितको परीक्षणका क्रममा ४५ जनामा भिरिंगी रोगको संक्रमण देखिएको हो ।

उनले भने, ‘अहिलेको समस्या भनेको एचआइभी संक्रमितमा भिरिंगी र क्षयरोगको समस्या बढ्दो क्रममा छ ।’ असुरक्षित यौन सम्पर्कका कारण संक्रमितहरुमा भिरिंगी रोगको संक्रमणसमेत देखिएको हो । संक्रमित सबैले रोग नियन्त्रणका लागि औषधि सेवन गरिरहेका छन् ।

सापकोटाका अनुसार परीक्षण गरिएकामध्ये १५ जनामा एचआइभी एड्ससँगै क्षयरोगसमेत देखिएको थियो । उनीहरुलाई अहिले नियमित औषधि सेवन गराइएको उनले जानकारी दिए । क्षयरोग देखिनुमा मुख्य समस्या संक्रमितहरुले मादक पदार्थ र धुम्रपानको सेवन अत्यधिक गर्नु रहेको छ । क्षयरोग पुष्टि भएका बाहेक अन्यलाई समेत औषधिको प्रयोग गरिँदै आइएको उनले बताए ।

फाउन्डेसनको सहयोगमा भरतपुर अस्पतालमा सञ्चालित एन्टी रेट्र्रो भाइरल थेरापी क्लिनिकका संयोजकसमेत रहेका सापकोटाका अनुसार जिल्लामा हाल एक हजार २१३ जना संक्रमितले एन्टी रेट्रो भाइरल औषधि सेवन गर्दै आएका छन् ।

उनीहरुमध्ये ५९२ जना पुरुष, ५६८ जना महिला, ३३ बालबालिका र २० जना तेस्रोलिंगी रहेका छन् । सन् २०२४ मा जिल्लाका विभिन्न स्थानमा गरिएको एचआइभी परीक्षणमा ७५ जना नयाँ संक्रमित भेटिएको सापकोटाले बताए । उनले भने, ‘सन् २०२४ यता तीन सय ९६ जनाको परीक्षणका क्रममा उनीहरुमा संक्रमण पुष्टि भएको हो ।’

यस वर्ष जिल्लामा नयाँ भेटिएका र बाहिरबाट स्थानान्तरण भएर आएका गरी १५१ जना नयाँ संक्रमितले औषधि सुरु गरेका छन् । यहाँ नियमित औषधि सेवन गर्नेमध्ये ३० जना स्थानान्तरण भएर गएको उनले बताए । १२ जना संक्रमितले नियमित औषधि सेवन गर्न छाडेको सापकोटाले जानकारी दिए ।