२७ वर्षदेखि अधुरै खानेपानी योजना

राजविराज । २७ वर्षदेखि खानेपानी निर्माणको योजना अधुरै रहँदा यहाँका नागरिक शुद्ध खानेपानीबाट वञ्चित भएका छन् । सप्तरीको हनुमाननगर कंकालिनी नगरपालिका–७ स्थित हनुमानगर बजारमा २७ वर्ष अगाडि नै निर्माण सुरु गएको खानेपानी आयोजना अहिलेसम्म पनि पूरा हुन सकेको छैन ।

स्थानीय स्वास्थ्यचौकी परिसरमा २०५४ सालमा निर्माण थालिएको खानेपानी योजना हालसम्म पिउने पानी योग्य बन्न नसकेको स्थानीयले बताएका छन् । तत्कालीन हनुमानगर गाउँ विकास समितिको पहलमा आयोजना सुरु गरिएको थियो ।

हनुमाननगर कंकालिनी नगरपालिका–७ का अमन यादवले खानेपानी आयोजना पूरा नहुँदा करिब १० हजारभन्दा बढी जनता प्रभावित भएको बताए । हनुमाननगर कंकालिनी नगरपालिकाले पनि यसप्रति कहिले पनि चासो नदिएको नेपाली कांगे्रसका प्रदेश सचिवसमेत रहेका बेचन खडकाले बताए ।

स्थानीय राजेन्द्र मिश्रले खानेपानी टयांकी निर्माण ७५ प्रतिशत भए पनि राजनीतिक खिचातानीले काम पूरा हुन नसकेको बताए । ‘पानी ट्यांकी निर्माण गरी पाइपलाइन बिच्छ्याउने काम अधुरै छ, नगरवासी ट्युबेलको आइरनयुक्त पानी खान बाध्य छन्,’ उनले भने । आयोजना ३ करोडको लागतमा निर्माण सुरु भएको थियो ।

आयोजनाको काम अधुरै भएपछि दोस्रोपटक २०७४ सालमा बोलपत्र आह्वान गरिएको थियो । तत्कालीन समयमा शान्ति निर्माण सेवा फर्सेठले निर्माणको जिम्मा पाएको थियो । फर्सेठका सञ्चालक नारायण यादवले आफूहरूले १३ लाख भुक्तानी नपाएपछि काम रोकिएको बताए ।

कोसीको तटीय क्षेत्रमा पर्ने हनुमाननगर कंकालिनी नगरपालिकामा १४ वटा वडा छन् । नगरपालिका उत्तरमा पूर्व–पश्चिम राजमार्गसँग जोडिएको छ भने दक्षिणतर्फ भारतीय सिमानासम्म फैलिएको छ ।