श्रीमतीको हत्या गरेर शव लुकाएको स्वीकार

जनकपुरधाम । एक सातादेखि घरबाट बेपत्ता रहेकी धनुषाकी एक महिलाको शव फेला परेको छ । क्षीरेश्वरनाथ नगरपालिका–५ महेन्द्रनगरकी २८ वर्षीया रुवी यादवको हत्या भएको अवस्थामा शव फेला परेको छ । २६ जेठदेखि बेपत्ता उनको शव मिथिला नगरपालिका–६ स्थिति सामुदायिक वनको खोल्सामा फेला परेको हो ।

श्रीमती बेपत्ता पछि गत बिहीबार पक्राउ परेका श्रीमान राजु यादवको बयानको आधारमा खोजबिन गर्दा शव शनिबार राति फेला परेको इलाका प्रहरी कार्यालय सखुवा महेन्द्रनगरका प्रहरी निरीक्षक सोन साहले जानकारी दिए । राजुले श्रीमतीको हत्या गरेको स्वीकारेका छन् ।
जेठ २६ गते बिहानै औरही बाबाको दर्शन गर्न भन्दै रुवीलाई लगेर हत्या गरेको पति राजुले बयान दिएका छन् । श्रीमतीलाई बेपत्ता गरेर हत्या गरेको आशंकामा उनलाई इलाका प्रहरी कार्यालय सखुवा महेन्द्रनगरले गत बिहीबार पक्राउ गरेको थियो ।

केही महिनाअघि वैदेशिक रोजगारबाट राजु घर फर्केपछि विवाद हुने गरेको थियो । परस्त्रीसँग राजुको हिमचिम हुँदा विवाद सुरु भएको बताइएको छ । रुवीको शव पोस्टमार्टमका लागि प्रादेशिक अस्पताल जनकपुरधाममा राखिएको छ । रुवीका ६ वर्षीय एक छोरा छन् । घटना विषयमा थप अनुसन्धान गरिरहेको प्रहरीले जनाएको छ ।

प्रतिक्रिया