चेपाङको जीवनीमा आधारित ‘पचेडा’

काठमाडौँ । कुनै समय म्युजिक भिडियोमा व्यस्त तथा सफल नाम हो, दीपेन्द्र केसी । पछिल्लो समय उनी भिडियो डकुमेन्ट्री निर्देशनमा व्यस्त छन् । यस्तैमा उनले चेपाङको जीवनीमा ‘पचेडा’ बनाएका छन् । जसको ट्रेलर पनि सार्वजनिक भएको छ ।

‘पचेडा’ मकवानपुरको मनहरि गाउँपालिका–४ का सदस्य विष्णुबहादुर प्रजाको सहयोगमा उनले तयार गरेका छन् । चेपाङ जंगलमै किन बसिरहेका छन् ? उनीहरू किन अवसरका लागि सहर पस्दैनन् ? भन्ने कथालाई आफूले डकुमेन्ट्रीमा देखाएको दीपेन्द्रले बताए ।

‘कुनै हरर फिल्मको झल्को दिने भएता पनि यो वास्तविक कथा हो । वृत्तचित्रमार्फत सन्तलालको परिवारले बाँच्नका लागि गरिरहेको संघर्ष कथालाई जस्ताको त्यस्तै देखाउने कोसिस गरेको छु’, दीपेन्द्रले भने ।

फिल्म निर्देशनका लागि गरेको अध्ययन उनले डकुमेन्ट्रीमा प्रयोग गरेका छन् । किनकि उनी आफैँ सन्तुष्ट हुनुपर्नेछ । उनले डकुमेन्ट्रीमा सन्तलाल चेपाङको कथा देखाएका छन् । उक्त कथालाई उनले तीन सेड्युलमा खिचेका थिए ।

‘मैले त्यहाँ डकुमेन्ट्री मात्र खिचिन्, सन्तलालको जीवनीसँग साक्षात्कार गर्ने मौका पनि पाएँ । उनीहरूको पीडालाई नजिकबाट बुझ्न पाएँ’, दीपेन्द्र भन्छन्, ‘मेरो इच्छा नै उनीहरूको जीवन र समुदायमा बदलाव ल्याउनु हो । किनकि अहिलेको समयमा सहर नपसेर जंगलमै बस्नु रहर होइन ।’

सो डकुमेन्ट्रीमा सन्तलालसँगै उनको परिवार फिचर्ड छन् । उनकै बसाइँरहेको मकवानपुर जिल्लाको मनहरि गाउँपालिकास्थित नयाँवस्तीमा खिचिएको छ । यसलाई निर्देशक दीपेन्द्रसँगै विनिता क्षेत्रीले निर्माण गरेका हुन् भने सहनिर्मातामा बालकृष्ण खड्गी रहेका छन् । वृत्तचित्रको प्रदर्शनी सोही चेपाङ बस्तीसँगै अस्ट्रेलियासहितका केही देशमा गर्ने तयारी निर्माण कम्पनी देव डी प्रोडक्सनले जानकारी दिएको छ ।