मस्कोलाई आतंकवादी हमला हुन सक्ने पूर्वसूचना थियो

मस्को । मार्च महिनाको सुरुमा रुसस्थित अमेरिकी दूतावासले अतिवादी समूहहरूले ‘मस्कोमा हुने कन्सर्टसमेत ठुला जमघटहरूलाई लक्षित गर्ने योजना बनाइरहेको भन्ने समाचारहरूको अनुगमन गरिरहेको बताएको थियो ।

इस्लामी समूहद्वारा रुसका मस्को र अन्य ठुला सहरहरू विगतमा पनि आक्रमणहरूको निशाना बन्ने गरेका छन् र त्यहाँ कुनै स्पष्ट राजनीतिक उद्देश्य बिनाका घटनाहरू पनि भएका छन् ।

शुक्रबार एक विज्ञप्ति जारी गर्दै ह्वाइट हाउसले शुक्रबार भनेको छ, ‘संयुक्त राज्य अमेरिकाले मार्चको सुरुमा रुसी अधिकारीहरूलाई मस्कोमा ठूला सभाहरूलाई लक्षित गरी योजनाबद्ध आतंकवादी हमला हुन सक्ने सूचना दिएको थियो ।’

राष्ट्रिय सुरक्षा परिषद्का प्रवक्ता एड्रिएन वाट्सनले वासिङ्टनले यो जानकारी रुसी अधिकारीसँग साझा गरेको बताउनुभएको छ । सन् २००२ मा चेचेन पृथकतावादी लडाकुहरूले मस्कोको डुब्रोभ्का थिएटरमा आक्रमण गरी ९१२ जनालाई बन्धक बनाएका थिए ।

विशेष सुरक्षा बलले बन्धकलाई रिहा गर्ने क्रममा थिएटरमा आक्रमण गर्दा १३० जनाको मृत्यु भएको थियो भने र सबै आक्रमणकारी बन्दुकधारीहरूलाई आत्मसमर्पण गराउन सफल भएको थियो ।– रासस, एएफपी