आठबिसकोट । रुकुम पश्चिमको आठबिसकोट नगरपालिकामा भूकम्प प्रभावितहरुका लागि अस्थायी आवास निर्माण गर्न पहिलो किस्ता स्वरुपको रकम लाभग्राहीको खातामा पठाइएको छ । नगरपालिकाभर साढे ९ हजार लाभग्राही यकिन भएकोमा हालसम्म तीन हजारभन्दा बढीको बैंक खातामा पैसा पठाइएको नगरपालिकाले जनाएको छ ।
आठबिसकोट नगरपालिकामा आवश्यक प्रक्रिया पुर्याएका ३ हजार ३ सय २३ जना भूकम्प प्रभावितहरुको खातामा पहिलो किस्ताबापत २५ हजार रकम पठाइएको नगरप्रमुख रवि केसीले बताए । केसीका अनुसार, बाँकी रहेका लाभग्राहीको खातामा रकम पठाउने काम जारी छ ।
उनका अनुसार नगरपालिकाभर हालसम्म १५ सय ४० वटा अस्थायी आवास निर्माण भएका छन् । विभिन्न राजनैतिक दल, समाजसेवी, सुरक्षाकर्मी, सञ्चारकर्मीलगायतले उक्त संरचना निर्माण गरेर घरधनिलाई बुझाइएको छ । भूकम्प पीडितलाई चिसोका कारण थप सकस भएको केसीको भनाई छ ।
जाजरकोट भूकम्पबाट सबैभन्दा बढी आठबिसकोट नगरपालिकामा क्षति भएको छ । अझै पालिकामा पाँच हजारभन्दा बढी घरपरिवार पालमुनि बस्दै आएका छन् ।
रुकुम पश्चिम
प्रतिक्रिया