संविधानको जिम्मेवारी पूरा गर्न संसद सदैव सक्रिय रहनेछ : उपसभामुख राना

काठमाडौं । उपसभामुख इन्दिरा रानामगरले संविधान दिवस, २०८० को अवसरमा देश तथा विदेशमा रहेका समस्त आमाबुवा, दिदीबहिनी दाजुभाइहरूमा सुख, शान्ति, समृद्धि एवं उत्तरोत्तर प्रगतिको हार्दिक शुभकामना व्यक्त गरेकी छन् ।

संविधान दिवसको अवसरमा आज एक शुभकामना सन्देश जारी गर्दै उनले संविधानसभाबाट जनताका प्रतिनिधिले संविधान जारी गरेको आजको यस ऐतिहासिक दिनमा परिवर्तनका लागि विभिन्न कालखण्डमा भएका गौरवपूर्ण जनक्रान्ति र जनआन्दोलनमा सहादत प्राप्त गर्ने सहिदप्रति उच्च सम्मानसहित श्रद्धाञ्जली व्यक्त गरेकी छन् ।

‘जनआन्दोलनका क्रममा घाइते भई अपांगता हुनुभएका सबै योद्धाको स्वास्थ्यलाभको कामना गर्दै उहाँहरूको योगदानको उच्च सम्मान गर्दछु, नेपालको संविधान निर्माणमा विशिष्ट भूमिका खेल्नुहुने राजनीतिक नेतृत्व, संविधानसभा सदस्य, नागरिक अगुवा, सञ्चार जगत्लगायत आमनागरिक सबैमा हार्दिक आभार व्यक्त गर्दछु’, सन्देशमा उनले भनेकी छन् ।

आजको दिन ऐतिहासिक जनक्रान्ति, जनआन्दोलन र जनसंघर्षबाट प्राप्त उपलब्धि नेपालको संविधानको दस्तावेजका रूपमा संस्थागत भएको दिन हो । नेपालीलाई एउटै सूत्रमा एकताबद्ध गर्ने देशको मूल कानुन संविधान जारी गरिएको यस दिनले सबैलाई संविधान कार्यान्वयन र यसको पूर्ण पालनाका लागि प्रेरणा दिने विश्वास लिएको उनले बताएकी छन् ।

विभिन्न ऐतिहासिक जनसंघर्षबाट प्राप्त गणतन्त्र, संघीयता, सामाजिक न्यायसहितको समावेशी, समानुपातिक प्रणाली, धर्मनिरपेक्षतालगायतका उपलब्धिलाई संविधानमा लिपिबद्ध गरी संस्थागत गरिएको उल्लेख गर्दै उपसभामुख रानाले नागरिकका मौलिक हक, अधिकार र स्वतन्त्रता पनि संविधानले सुनिश्चित गरेको बताएकी छन् ।

‘संविधान जारी भएको आठ वर्षको अवधिमा संघीय संसद्ले थुप्रै ऐन, कानुन निर्माण गरी संविधान कार्यान्वयनमा विशेष जिम्मेवारी पूरा गर्दै आएको छ, संघीयता कार्यान्वयनका लागि आवश्यक केही कानुन बन्ने क्रममै छन्, संविधान कार्यान्वयनको जिम्मेवारी पूरा गर्न संघीय संसद सदैव सक्रिय भइरहने छ’, उनले सन्देशमा उल्लेख गरेकी छन् ।