शौच गर्न अब घुम्टो ओड्दैन बालुवाटोल

पहिला बलुवाटोलबासी शौच गर्न नदी किनारमा एक लाइनमा महिला र अर्को लाइनमा पुरुष रहरै बसेका भेटिन्थे । सामुदायिक शौचालय बनेपछि अहिले यो टोल नै फेरिएको छ ।

लहान । आशादेवी पासमानलाई अचेल सबेरै झिसमिसेमा आँखा मिच्दै साथीहरूलाई जम्मा गरी हुल बाँधेर खुट्टी खोलाको किनारमा शौच गर्नुपर्ने विवशता हटेको छ । घर नजिकै सामुदायिक शौचालय बनेसँगै सिरहाको लहान नगरपालिका–५ बलुवा टोलकी आशादेवीजस्तै यहाँका नागरिकको दैनिकीमा परिवर्तन आएको छ ।
आफ्नै टोलमा बनेको शौचालयमा सुरक्षितरूपमा दिसापिसाब गर्न पाएपछि आशादेवी बाहिर शौच गर्नुपर्ने चिन्ताबाट मुक्त भएकी छन् । अलि पर खोला किनारमा बिहान झिसमिसेमै शौच गर्न जाँदा लाग्ने समय अब उनी घरधन्दामा बिताउँछिन् । सामुदायिक शौचालय बनेपछि आशादेवीजस्तै मुख्य गरी यहाँका गृहणी महिलाको समयको बचत मात्र भएको छैन, कसैले देख्छ कि भनेर किस्तावन्दीमा डराइडराई शौच बस्नुपर्र्ने बाध्यता पनि हटेको छ ।

४७ परिवार बस्दै आएको बलुवा टोलमा अधिकांश सुकुम्बासी दलित समुदायका छन् । उनीहरूसित न शौचालय बनाउने जग्गा छ, न त लगानी गर्ने पैसा । ‘घरमा शौचालय नहुँदा धेरै दुःख भोग्नुपर्ने बाध्यता थियो । झिसमिसे अँध्यारोमै खुला दिसा बस्नुपर्दा किरामिरा र सर्पको डर थियो’, आशादेवीले भनिन्, ‘अझ झरी पर्दा र खोलामा बाढी आएको बेला त झन शौच गर्न कहाँ जाने होला भन्ने चिन्ता हुन्थ्यो ।’ उनले प्रफुल्ल हुँदै भनिन्, ‘अब नजिकै शौचालय बनेपछि यो समस्याबाट मुक्ति पाइयो ।’

‘वाटर एड नेपाल’ को प्राविधिक सहयोग र दलित जनकल्याण युवा क्लब, लहान नगरपालिका, नेपाल खानेपानी संस्थान लहानको संयुक्त साझेदारीमा सञ्चालित ‘विकन परियोजना’ अन्तर्गत टोलमा सामुदायिक शौचालय सञ्चालनमा आएपछि यो बस्तीका स्थानीयले खोला किनारतिर खुला शौच गर्नुपर्ने बाध्यताको अन्त्य भएको हो ।
चार वर्षअघि नेपाललाई खुला दिसामुक्त राष्ट्र घोषणा गरियो । खुला दिसामुक्तको मानक पूरा गर्ने नेपाल दक्षिण एसियाकै पहिलो देश भनी घोषणा गरिए पनि त्यसले मधेसका दलित तथा गरिब बस्तीलाई छुनै सकेन । लहान–५ का निवर्तमान वडाध्यक्ष मोहम्मद सुलेमान अन्सारी भन्छन्, ‘यस समुदायमा सबै सुकुम्बासी छन । उहाँहरूसँग जग्गा अभावले घरमा शौचालय बनाउने कुरा भएन । नदी किनारमा खुला ठाउँमा शौच गर्न बाध्य थिए । सामुदायिक शौचालयका लागि नगरपालिका र विभिन्न संघसंस्थालाई बारम्बार अनुरोध गरिरह्यौँ र अहिले आएर हाम्रो पहलकदमी सार्थक बनेको छ ।’

यसअघि टोलवासीले शौचालय बनाइदिने आश्वासन पर्याप्त पाएका थिए तर एउटा शौचालय पनि बन्न सकेको थिएन । ‘जो आए पनि नाम लेखेर जान्थे’ स्थानीय निरादेवी पासमानले भनिन्, ‘टोलमा घरभन्दा राम्रो शौचालय बन्छ होला भनेर त शोचेको पनि थिएन । टोलमा कसैले घर दिन्छु, कसैले घरैघर चापाकल दिन्छु भन्थे, तर उहाँहरू (दलित जनकल्याण) ले त साँच्चिकै नै यति राम्रो चर्पी बनाइदिनुभयो ।’

स्थानीयका अनुसार पहिला पहिला बलुवा टोलमा मुख छोपेर हिँड्नुपर्ने अवस्था थियो । नदीको किनारमा एक लाइनमा महिला तथा अर्को लाइनमा पुरुष शौच गर्न बसेका हुन्थे । पहिले जताततै दिसापिसाब मात्र देखिने बलुवा टोलमा शौचालय बनेपछि गाउँको मुहारै फेरिएको छ । सरसफाइले स्थानीयको स्वास्थ्यमा पनि सुधारसमेत आएको छ । शौचालय अभावमा घरवरपर जथाभावी दिसापिसाबका कारण झाडापखाला, आउँ, टाइफाइडलगायत रोगले सताउने भए पनि अहिले कमी आएको स्थानीय बताउँछन् ।
दलित हक अधिकारको क्षेत्रमा काम गर्ने दलित जनकल्याण युवा क्लबका कार्यकारी निर्देशक विनोदकुमार विसुन्केले दलित बस्तीमा शौचालयको अभाव देखेपछि उक्त समस्यालाई सामधान गर्न पहल गरेको जानकारी दिए ।

लहान–५ का वडाध्यक्ष मोहम्मद अब्दुल करिमले शौचालयको अभावमा खुला ठाउँमा शौच गर्न बाध्य र समाजमा पछाडि पारिएको यस क्षेत्रलाई आफ्नो पहिलो प्राथमिकतामा राखेर काम गरिएको बताए । सामुदायिक शौचालय तयार भइसकेपछि लहान नगरप्रमुख महेशप्रसाद चौधरीले भने, ‘घरभन्दा राम्रो शौचालय बनेको छ, यसको संरक्षण गर्नु हामी सबैको जिम्मेवारी हो ।’

यहाँ बनेका अपांगतामैत्री १४ वटा सामुदायिक शौचालय ४७ परिवारले प्रयोग गर्दछन् । उनीहरूले ‘बलुवा टोल सामुदायिक शौचालय मर्मतसम्भार समिति’ गठन गरेका छन् । शौचालयको स्थायित्वका लागि भन्दै प्रयोगकर्ताले मासिक शुल्क प्रतिघर रु एक सयका दरले संकलन गर्ने गरिएको छ । संकलित रकम शौचालयमा प्रयोग भएको बिजुलीको महसुल तिर्न तथा शौचालय व्यवस्थापनमा खर्च गरिने समितिका सचिव किरणकुमारी पासमानले जानकारी दिए ।