करेन्ट लागेर विद्युत प्राधिकरणका प्राविधिकको मृत्यु

खोटाङ । करेन्ट लागेर नेपाल विद्युत प्राधिकरण दिक्तेल वितरण केन्द्र, खोटाङका दैनिक ज्यालादारी प्राविधिकको मृत्यु भएको छ । विगत ८–९ वर्षदेखि दैनिक ज्यालादारी प्राविधिककोरुपमा काम गर्दै आएका दिक्तेल रुपाकोट मझुवागढी नगरपालिका–४ खाल्लेका ४० वर्षीय नविन्द्र राईको आइतबार साँझ करेन्ट लागेर मृत्यु भएको हो ।

दिक्तेल रुपाकोट मझुवागढी नगरपालिका–१४ बुईपा छापगाउँमा विद्युत मर्मतपछि भर्याङ ठड्याएर हिँड्ने क्रममा भर्याङले ११ केभी प्रशारण लाईनको तार छुन पुग्दा राईलाई करेन्ट लागेको विद्युत प्राधिकरण दिक्तेल वितरण केन्द्रका प्रमुख विजयराज रेग्मीले बताए ।

करेन्ट लागेपछि गम्भीर घाइते भएका राईको बुईपास्थित सनराइज अस्पतालमा उपचारको क्रममा मृत्यु भएको प्रहरीले जनाएको छ । थप उपचारको लागि अन्य लैजाने तयारी हुँदाहुँदै राईलाई मृत घोषित गरिएको थियो ।

अवरुद्ध विद्युत सुचारु गराउन र जलेको ट्रान्सफर्मर हेर्नका लागि राईसहित चार प्राविधिकको टोली बुईपा छापगाउँ पुगेका थिए । शव पोष्टमार्टमको लागि जिल्ला अस्पताल दिक्तेल लगिएको छ ।

‘काम गर्दागर्दै करेन्ट लागेको होइन, काम सकेर विद्युत चालु भएपछि भर्याङ बोकेर हिँड्ने क्रममा भर्याङले हाइटेन्सन छुन पुग्दा करेन्ट लागेको हो,’ प्रमुख रेग्मीले भने, ‘विद्युत मर्मत गर्न र जलेको ट्रान्सफर्मर हेर्न चार जना कर्मचारी खटिएको थियो ।’

करेन्ट लाग्दा २४ घण्टा नपुग्दै जिल्लामा दुई जनाले ज्यान गुमाएका छन् । स्थानीय नाखामखोला लघु जलविद्युत आयोजनाको पोलमा चढेर जम्पर जोड्ने क्रममा करेन्ट लाग्दा दिक्तेल रुपाकोट मझुवागढी नगरपालिका–१० पाथेकाका ३६ वर्षीय प्रकाश राईको शनिबार राती मृत्यु भएको थियो ।