पर्वत । पर्वतका साथ स्थानीय तहको मत गणना बुधबार सम्पन्न भएको छ । दुई नगरपालिका र पाँच स्थानीय तह रहेको पर्वतमा पुरानादेखि नयाँसम्म जनप्रतिनिधि निर्वाचित भएका छन् । कुश्मा नगरपालिकाको नगरप्रमुखमा गठबन्धन दलको तर्फदेखि नेपाली कांग्रेसका उम्मेदवार रामचन्द्र जोशी विजयी भएका छन् । जोशीले नेकपा एमालेका गणेश शर्मा पौडेललाई ७ सय ७५ मतान्तरले जितेका हुन् । निर्वाचित जोशीले ९ हजार ८ सय ६४ मत ल्याउँदा शर्माले ९ हजार ८९ मत ल्याएका छन् । निर्वाचित जोशी कुश्मा नगरपालिकाको संस्थापक मेयरसमेत हुन् । उनको यो दोस्रो कार्यकाल हो । उपप्रमुखमा भने नेकपा एमालेकी स्वस्थानी रिजालले विजयी हासील गरेकी छन् । गठबन्धन दलबाट उपप्रमुखमा उठेका माओवादी नेता शंकर गिरी ८ सय १० मतले पछि परेका हुन् । निर्वाचित रिजालले ९ हजार ९२ मत ल्याउँदा गिरीले ८ हजार २ सय ८२ मत ल्याएका छन् । ०७४ को स्थानीय चुनावमा पनि यस नगरपालिका कांग्रेसले नै नेतृत्व गरेको थियो । भने पराजित भएका गिरी माओवादी केन्द्रबाट नगरमा मेयरमा पराजित भएका थिए ।
पर्वतको अर्को नगरपालिका फलेवास नगरपालिकामा पनि नेपाली कांग्रेसका गंगाधर तिवारी नगरप्रमुखमा विजयी बनेका छन् । गठबन्धन दलबाट उठेका तिवारीले नेकपा एमालेका उम्मेदवार पदमपाणी शर्मालाई पराजित गरेका हुन् । निर्वाचित तिवारीले ७ हजार ७ सय मत ल्याउँदा संस्थापक नगरप्रमुखसमेत रहेका शर्माले ६ हजार ३ सय ३८ मत ल्याएका छन् । ०७४ को स्थानीय चुनावमा पनि तिवारी र शर्माबीच प्रतिस्पर्धा रहेको थियो । त्यो बेला भने एमालेका शर्मा नगरप्रमुख बन्न सफल भएका थिए । त्यस्तै उपप्रमुखमा पनि गठबन्धन दलबाट उठेकी माओवादी नेतृ शोभा क्षेत्रीले नेकपा एमालेकी उपप्रमुखकी उम्मेदवार मन्जु अधिकारीलाई पराजित गरेकी छन् । अधिकारी फलेवास नगरपालिकाकी संस्थापक उपमेयर हुन् । निर्वाचित क्षेत्रीले ६ हजार ३ सय २७ मत ल्याइन् भने अधिकारीले ६ हजार ५७ मत ल्याएकी छन् ।
पर्वतको बिहादी गाउँपालिकाको पनि मतगणना सकिएको छ । गठबन्धन दलबाट उम्मेदवार बनेका प्रविन गुरुङ अध्यक्षमा विजयी बनेका छन् । उनले नेकपा एमालेका ओम कुँवरलाई पराजित गरेका हुन् । गुरुङले ३ हजार ४ सय ६९ मत ल्याउँदा कुँवरले २ हजार ९ सय ३७ मत प्राप्त गरेका छन् । ५ सय ३२ मतान्तरले एमालेका कुँवरलाई पछि पारेका छन् । उपाध्यक्षमा भने नेकपा एमालेकी उम्मेदवार मीनाकुमारी शर्मा तिवारीले ३ हजार २ सय २७ मत पाएर विजयी बनेकी छन् । उनका प्रतिस्पर्धी माओवादीका सन्तबहादुर गुरुङले ३ हजार ५० मत पाएका छन् । ०७४ को स्थानीय तहको चुनावमा भने यस पालिकाको नेतृत्व नेकपा एमालेले गरेको थियो ।
पर्वतको पैयुँ गाउँपालिकामा नेपाली कांग्रेसले अध्यक्ष पद जित्न सफल भएको छ । पैयुँको मंगलबार आएको नतिजाअनुसार पैयुँ गाउँपालिकामा नेपाली कांग्रेसका तोरण मल्ल ठकुरी विजयी बनेका हुन् । उनले नेकपा एमालेका महेन्द्र श्रेष्ठलाई पराजित गरेका हुन् । निर्वाचित ठकुरीले ३ हजार ८ सय २४ मत ल्याउँदा प्रतिस्पर्धी श्रेष्ठले ३ हजार ३ सय ७८ मत ल्याएका छन् । त्यस्तै उपाध्यक्षमा भने नेकपा एमालेकी यामकुमारी रानाले जितेकी छन् । उनले कांग्रेसकी जानकी प्रधानलाई पराजित गरेकी हुन् । विजयी रानाले ३ हजार ७ सय ७७ मत ल्याउँदा प्रधानले ३ हजार ४ सय ५८ मत ल्याएकी छन् । ३ सय १९को मतान्तरले राना विजयी भएकी छन् । ०७४ को स्थानीय चुनावमा यस गाउँपालिका कांग्रेसले जितेको थियो ।
पर्वतको जलजला गाउँपालिकामा गठबन्धन दलबाट उम्मेदवार बनेका नेपाली कांग्रेसका राजुप्रसाद आचार्य अध्यक्षमा विजयी बनेका छन् । उनले नेकपा एमालेका लालबहादुर अधिकारीलाई हराएका हुन् । निर्वाचित आचार्यले ५ हजार ६ सय ५७ मत ल्याउँदा प्रतिस्पर्धी अधिकारीले ४ हजार १ सय ८४ मत ल्याएका छन् । त्यस्तै उपाध्यक्षमा पनि गठबन्धन दलकै माओवादी उम्मेदवार दीपक आचार्यले नेकपा एमालेकी सुनिता बरुवाललाई पराजित गरेका छन् । उनले ४ हजार ७ सय ९२ मत ल्याउँदा बरुवालले ४ हजार ७ सय १५ मत ल्याएकी छन् ।
यस्तै पर्वतको महाशिला गाउँपालिकाको नतिजा सार्वजनिक भएको छ । पालिका अध्यक्षमा नेकपा एमालेका ईश्वरीप्रसाद भुसाल र उपाध्यक्षमा एमालेकी धनसुवा विक विजयी भएकी छन् । कांग्रेसका अशोक उचै ठकुरीलाई निर्वाचित भुसालले ४ सय ४७ मतान्तरले जितेका छन् । उनले २ हजार ७ सय ५३ मत ल्याउँदा कांग्रेसका ठकुरीले २ हजार ३ सय ६ मत ल्याएका छन् । यस्तै उपाध्यक्षमा गठबन्धनतर्फका समाजवादी उम्मेदवारी बिराज हमालले १ हजार ९ सय ६९ मत ल्याउँदा एमालेकी विकले २ हजार ७ सय ६ मत ल्याएर विजयी भएकी हुन् ।
पर्वतको मोदी गाउँपालिकामा नेकपा एमालेका उम्मेदवारहरू विजयी बनेका छन् । अध्यक्षमा हिरादेवी शर्मा र उपाध्यक्षमा विमल लामिछानेले जित हात पारेका हुन् । गठबन्धन दलका माओवादी उम्मेदवार गुप्तबहादुर हमाललाई १ हजार ३ सय ३९ मतले हराउँदै शर्माले जित सुनिश्चित गरेकी हुन् । शर्माले ६ हजार १९ मत ल्याएकी छन् भने हमालले ४ हजार ६ सय ८० मत ल्याएका छन् ।
उपाध्यक्षमा गठबन्धकै नेपाली कांग्रेसका उम्मेदवार रामबहादुर प्रसाईलाई पराजय गर्दै लामिछाने पालिकाको उपाध्यक्ष बन्न सफल भएका छन् । लामिछानेले ६ हजार ३ सय ३ मत ल्याउँदा प्रसाईले ४ हजार ६ सय ५४ मत ल्याएका छन् । पर्वतको सबैजसो वडामा गठबन्धनबाट प्रमुखमा विजयी भएका छन् भने उपप्रमुखमा अधिकांशमा एमालेबाट निर्वाचित भएका छन् ।
प्रतिक्रिया