के प्रियांकाले भ्रुणको लिंग जाँच गराएकी थिइन् ?

काठमाडौं । अभिनेत्री प्रियंका कार्कीले पूर्व घोषणा अनुसार नै छोरीलाई जन्म दिएकी छन् । गर्भवती हुँदादेखि नै सामाजिक सञ्जालमा तस्विरहरु सार्वजनिक गर्दै चर्चामा आएकी कार्कीले तीन महिना अगाडि नै छोरी जन्मिने संकेत गरेकी थिइन् ।

यतिबेला छोरी जन्माएपछि पनि अभिनेत्री कार्कीले आफ्नो सामाजिक सञ्जालमा तस्विर सार्वजनिक गर्दै आफू आमा बनेको उल्लेख गरेकी छन् । अभिनेत्री कार्कीले ‘यो सुन्दर संसारमा छोरी आयंका कार्कीलाई स्वागत छ’, भनेर सामाजिक सञ्जाल फेसबुमा लेखेकी छन् ।

उक्त तस्विरमा प्रियंका र उनका श्रीमान् आयुष्मान देशराज जोशी खुशी देखिएका छन् । नायिका प्रियंका र नायक आयुष्मान देशराज जोशीले २०७६ सालमा विवाह गरेका हुन् ।

आफू गर्भवती भएपछि उनले सामाजिक सञ्जालमा सार्वजनिक गरेका तस्विरहरुले उनको केही चर्चा र आलोचनासमेत भएको थियो । प्रियांकाले छोरी जन्माउने कुरा पहिले नै सार्वजनिक गरेकी थिइन् । तीन महिना अगाडि नै गर्भमा रहेकी छोरीको नामसमेत जुराएर तस्विरमा ‘आयंका’ लेखी सामाजिक सञ्जालमा सार्वजनिक गरिएको थियो ।

अभिनेत्री कार्कीकी डाक्टर आमा अंगुर कार्कीले पनि आफ्नो सामाजिक सञ्जाल फेसबुकमा तीन महिना अगाडि नै छोरी जन्मिने संकेतसहितको तस्विर सार्वजनिक गरेकी थिइन् । नेपालको कानूनले भने गर्भमा रहेको भ्रुणको लिंग पहिचान गर्न बन्देज गरेको छ ।