खोजखबर

नमोबुद्धमा ४० बेडको आइसोलेशन तयार, एक बिरामी भर्ना

शुकदेव थपलिया २०७८ वैशाख २४ गते १८:३१ मा प्रकाशित

काभ्रे । नमोबुद्ध नगरपालिका– ४ स्थित जनक बहुमुखी क्याम्पसमा ४० बेडको आइसोलेशन केन्द्र तयार भएको छ । नमोबुद्ध नगरपालिका र रोशी गाउँपालिकाले संयुक्तरुपमा मेथिनकोट अस्पतालसँगै रहेको क्याम्पस भवनमा आइसोलेसन केन्द्र स्थापना गरेका हुन् । उक्त आइसोलेसन केन्द्रमा हाल एकजना बिरामी राखिएको छ ।

नमोबुद्ध नगरपालिकाकी ६० वर्षीया कोरोना संक्रमित महिलालाई आइसोलेशनमा राखी उपचार अघि बढाइएको हो । मेथिनकोट अस्पतालमा उपचारको क्रममा गरिएको पिसिआर परिक्षणमा उनमा कोभिड–१९ को संक्रमण पुष्टि भएको थियो । बुधबार संक्रमण पुष्टि भएकी महिलाको अवस्था अहिले सुधारोन्मुख रहेको मेथिनकोट अस्पतालका निमित्त मेडिकल सुपरिटेण्डेन्ट डा. सागर जर्घामगरले जानकारी दिए ।

नमोबुद्ध नगरपालिका र रोशी गाउँपालिकाबीच सोमबार संयुक्त आइसोलेशन स्थापनाको सहमति भएको थियो । सहमति अनुसार आइसोलेसनका लागि आवश्यक सबै पूर्वाधारको व्यवस्था गरी सञ्चालनमा ल्याइएको नमोबुद्ध नगरपालिकाका प्रमुख प्रशासकीय अधिकृत राजन पौडेलले जानकारी दिए ।

आज (शुक्रबार) नमोबुद्ध नगरपालिका र रोशी गाउँपालिकाको टोलीले आइसोलेशन केन्द्रको अनुगमनसमेत गरेको छ । दुबै पालिकामा रहेका सीमित जनशक्तिलाई संयुक्त र एकीकृत ढंगबाट परिचालन गर्दै कोभिड–१९ विरुद्धको अभियानलाई प्रभावकारी बनाउन र आइसोलेशनमा बस्नुपर्ने बिरामीको सेवा थप प्रभावकारी बनाउन दुई पालिकाबीच सहमति गरिएको नमोबुद्ध नगरपालिकाका प्रमुख प्रशासकीय अधिकृत पौडेलले बताए ।

आइसोलेशन केन्द्रमा रहेका सबै बेडमा अक्सिजनसहितको अत्यावश्यक स्वास्थ्यसामग्रीको व्यवस्थापन गरिएको छ भने चौबिसै घण्टा स्वास्थ्यकर्मीले हेरचाह र निगरानी गर्ने व्यवस्था गरिएको छ ।

आइसोलेसन केन्द्रमा कालीजंग गण धुलिखेलको टोलीले सुरक्षा दिनेछ । आइसोलेसनमा दुबै पालिकाबाट एक एक जना चिकित्सक आलोपालो हुनेगरी खटिनेछन् भने कोभिड १९ का बिरामीको संख्याको आधारमा दुबै पालिकाबाट स्वास्थ्यकर्मी खटाइनेछ ।

प्रतिक्रिया

पछिल्ला अपडेट्स

लोकप्रिय