डडेलधुरा । कोरोना महामारीका कारण रोजगारी गुमाएका महिला तथा पुरुष नदी किनारको बालुवा र गिट्टीमा आश्रित बन्दै गएका छन् ।
डडेल्धुराको गन्यापधुरा गाउँपालिका वडा नं. २ र ३ का अधिकांश महिला र पुरुष रडुवा खोला र सकायल खोलाका किनारहरुमा बालुवा, ढुङ्गा र गिट्टी बेचेर घर खर्च चलाइरहेका छन् । नेपाल तथा भारतका विभिन्न शहरहरुमा काम गर्दै आएका पुरुषहरु कोरोनाका कारण रोजगारी गुमाएर घर आएपछि नदीका बालुवा तथा गिट्टीमा आश्रित भएका छन् ।
बिहान ६–७ बजेदेखि नै नदी किनारमा बालुवा, गिट्टी र ढुङ्गा संलनका बालुवा प्रतिट्र्याक्टर तीन हजार, गिट्टी प्रतिट्र्याक्टर दुई हजार ५ सय र ढुङ्गा एक हजार ३ सय रुपैयाँका दरले बिक्री गर्ने गरेको स्थानीय सागर ठगुन्नाले बताए । । भारतमा होटेलमा काम गर्दा मासिक भारतीय २० हजार कमाउने गरेको भए पनि कोरोनाले रोजगारी गुमेपछि घर परिवार पाल्नका लागि बालुवा तथा गिट्टी संकलन गरी बिक्री गर्दै आइरहेको उनले बताए ।
कोरोनाले रोजगारी गुमेको भए पनि नदीको बालुवा गिट्टीले साँझ बिहानको जोहो गर्न सजिलो भएको गन्यापधुरा–३ का इन्द्र दमाईले बताए । उनले भने, ‘भारतमा काम गर्ने होटेल बन्द भएपछि घर आएको हुँ घर खर्च चलाउनका लागि अहिले वालुवा गिट्टी बेच्ने गरेको छु ।’ तीन–चार दिनमा एक ट्र्याक्टर बालुवा तथा गिट्टी बिक्री गरी मासिक २५–३० हजार आम्दानी गर्ने गरेको उनको भनाइ छ ।
गाउँपालिकाले पालिकाभित्र रहेका बेरोजगारहरुको तथ्यांक संकलन गरिहेको र उनीहरुको सीपअनुसारे रोजगारी सिर्जना गर्ने गन्यापधुरा गाउँपालिका अध्यक्ष नवलबहादुर मल्लले बताए । पालिकाले गर्ने विकास निर्माणका काममा स्थानीय व्यक्तिलाई मात्रै प्रयोग गर्ने र व्यावसायिक तथा सामूहिक कृषि खेती गर्न पालिकाले विशेष अनुदान दिने नीति ल्याएको अध्यक्ष मल्लले बताए ।
