म्याग्दीमा पनि फेला पर्‍यो कोरोना

म्याग्दी । जिल्लामा पहिलोपटक बिहीबार एक जनामा कोरोना भाइरस संक्रमण पुष्टि भएको छ। म्याग्दीको मालिका गाउपालिका–२ रुमका ३० वर्षीय युवालाई कोरोना संक्रमण पुष्टि भएको हो।

बेनीको न्यूवेष्ट प्वाइन्ट आवासीय माविको क्वारेन्टिनमा रहेका पुरुषको पोखरास्थित क्षेत्रीय प्रयोगशालामा स्वाब परीक्षणका क्रममा कोरोना संक्रमण पुष्टि भएको स्वास्थ्य कार्यालय म्याग्दीका प्रमुख एकनारायण लम्सालले बताए ।

संक्रमितलाई शैक्षिक तालिम केन्द्रमा स्थापना भएको आइसोलेसनमा लगिएको छु, उनले भने, ‘बिहीबार बिहान १४ जनाको स्वाब पोखरा पठाइएकामा परीक्षण गर्दा एक जनामा कोरोना पोजेटिभ पुष्टि भएको छ।’

कोरोना संक्रमित युवा जेठ ९ गते सुनौलीनाका हुँदै भारतबाट बेनी आएका थिए। उनी र सँगै आएकालाई सिधैँ क्वारेन्टिनमा लगेर राखिएकाले ‘ट्राभल हिस्ट्री’ देखिएको छैन। उनी बागलुङको बडीगाड र तमानखोला गाउँपालिकाका कोरोना संक्रमितसँगै एउटै बसमा आएका थिए।

म्याग्दीमा बिहीबारसम्म भारतबाट आएका ८५ लाई क्वारेन्टिनमा राखिएको प्रमुख जिल्ला अधिकारी ज्ञाननाथ ढकालले बताए।

कोरोना संक्रमण परीक्षणका लागि बिहीबार म्याग्दी बहुमुखी क्याम्पसको क्वारेन्टिनमा बसेका २९ को स्वाब संकलन गरिएको छ।