काठमाडौँ । नेपाली चलचित्र उद्योगको सर्वोच्च सरकारी निकाय चलचित्र विकास बोर्डको अध्यक्ष पद एक महिनायता रिक्त रहेको छ । गत मंसिर २९ गते तत्कालीन बहालवाला अध्यक्ष केशव भट्टराईको निधन भएपछि बोर्डमा अध्यक्षको पद रिक्त रहेको हो । राजनीतिक भागवण्डा र सत्तारुढ दल निकटका चलचित्रकर्मी बोर्डको अध्यक्षमा नियुक्ती गर्ने परिपाटीले अहिले पनि अध्यक्षको दौडमा दर्जन भन्दा बढी चलचित्रकर्मी सामेल भएको फिल्मी नगरीमा चर्चा चलेको छ ।
बोर्डको अध्यक्ष पदका लागि अभिनेताद्वय राजेश हमाल र भुवन केसीसँगै निर्देशक दयाराम दाहाल, अभिनेता तथा निर्देशक नवल खड्का, निर्देशक तथा कलाकार लय संग्रौला, निर्देशक आकाश अधिकारी र निर्देशक केपी पाठक आन्तरिक तयारीमा रहेका छन् । बोर्डको अध्यक्षमा दाबेदारमध्ये निर्देशक दयाराम दाहाल बलियो दाबेदार भएका व्यक्ति हुन् । अहिलेका बोर्ड सदस्य पनि हुन् दाहाल । नेपाली चर्चा क्षेत्रमा साढे तीन दशकदेखि योगदान पुर्याइरहेका वरिष्ठ निर्देशक दाहाल चलचित्र बोर्डको अध्यक्ष पदको लागि योग्य भएको समेत चलचित्रकर्मीहरुले टिप्पणी गर्न थालेका छन् ।
बोर्डको सदस्य पदमा नियुक्ति लिँदा दाहालले भनेका थिए, ‘अहिले बोर्डमा कामकाज शुन्य नै छ । राष्ट्रिय अवार्ड पनि २ वर्षदेखि वितरण गरिएको छैन । सबैको चासोको विषय बक्सअफिस सिस्टम पनि नाम मात्रको भएको छ । बाहिर बसेर शुन्यता हेर्नु भन्दा पनि, सानै पदबाट केहि गर्न सकियोस भन्ने हेतुले सदस्य पदमा नियुक्ति पत्र लिएको हुँ ।’ उनले भनेअनुसार रोकिएको बोर्डको काम सम्पन्न भइसकेका छन् भने कतिपय कामले भने गति लिन बाँकी छ । उनी बोर्डमा आवद्ध भएसँगै फिल्मका व्यापारिक अवस्थालाई नजिकबाट नियालेको बताएका थिए । ’पहिला फिल्म बनाउन चप्पल खियाउन पर्थ्यो अहिले प्रविधिले हामीलाई धेरै अघि ल्याएको छ ।
बोर्डमा आवद्ध भएसँगै मैले फिल्मको ब्यापारलाई नजिकबाट नियाल्ने अवसर पाएँ । अचेल यति कमायो, उति कमायो भनेर हावादारी कुरालाई बढावा दिएको देखिन्छ। वास्तवमा नेपाली फिल्म क्षेत्र खुकुरीको धारमा दौडनुपर्ने अवस्थामा छ । धारमा जो बढी दौडन्छ, त्यसलाई चोट बढी लाग्छ । यो धारबाट फिल्म क्षेत्रलाई राजमार्गमा ल्याउन जरुरी छ ।’ उनी २०७५ मंसिरदेखि बोर्डको सदस्यको रुपमा कार्यरत छन् ।
सन् १९८८ मा निर्माण भएको फिल्म ‘लाहुरे’मा सहायक निर्देशकको रुपमा काम गर्दै फिल्म क्षेत्रमा देखिएका दाहाल कुशल निर्देशक, लेखक तथा गीतकार पनि हुन् । उनले ठुल्दाइ, तँ त साह्रै बिग्रिस नि बद्री, अर्जुन, कर्मयोद्धा, जंगे, ढुकढुकी, भाग्य विधाता, पालेदाई, अरवपति, दौंतरी, अग्नी ज्वाला, जेठो कान्छोलगायत दुई दर्जन बढी हिट फिल्म दिएका छन् । दाहाल नेपालमा सबै भन्दा धेरै फिल्म निर्देशन गर्ने निर्देशकका रुपमा चिनिन्छन् । फिल्मका विभिन्न भूमिकामा रहेर ६० भन्दा बढी फिल्महरुमा उनको संलग्नता रहेको छ ।
तत्कालिन अध्यक्ष भट्टराईको असमायिक निधन पश्चात हाल यी सबै कार्यक्रमहरु स्थगीत र सुचारु हुन सकेको छैन । चलचित्र विकास बोर्डको अध्यक्ष पदका लागि सरकारले विज्ञापन निकालिसकेको छैन । बोर्ड अध्यक्ष चयन हुन अझै केही समय लाग्ने निश्चित प्रायः छ । सो योजनामा समेत दाहालको सक्रियता रहेको छ । उक्त योजनाहरुलाई मूर्त रुप दिन पनि बोर्डको अध्यक्षमा दाहाल उपयुक्त बन्न सक्छ । अहिले अध्यक्षका लागि नाम आएका सबै ब्यक्तिहरुले पनि दयाराम दाहाल अध्यक्ष रहने खण्डमा कुनै बिमती जनाउने छैनन् । किनकी फिल्म क्षेत्रका सबै किसिमको समस्या पहिचान गर्न सक्ने क्षमता केवल दयाराम दाहालमा मात्रै रहेको छ ।
फिल्मका अभिनेता तथा कलाकारहरुलाई कलाकारकै समस्या मात्रै बढि थाहा हुन्छ, निर्माता तथा निर्देशक लाई फिल्म निर्माणका समस्या मात्रै थाहा हुन्छ तर दयाराम दाहाललाई समग्र फिल्म क्षेत्रकै सबै समस्याको वारेमा जानकारी भएको उनका बिगतका कामले प्रष्ट्याईसकेको छ । दयाराम दाहाल फिल्मकर्मीहरुमा बौद्विक ब्यक्तित्व पनि मानिन्छन् । उनी बोर्डका लागि प्रशस्त समय व्यवस्थापन गर्न सक्ने व्यक्ति पनि हुन् ।
फिल्म क्षेत्रका नीति नियमका कुरामा पनि उनी सजग छन् । तसर्थ चलचित्र बिकास बोर्डको अध्यक्षमा दयाराम दाहाल नियुक्त भएको खण्डमा ९५ प्रतिशत फिल्मकर्मीहरु खुशि हुनेछन् । आफुपनि अध्यक्षको लागि उपयुक्त मानिने केही निर्माता, निर्देशक, अभिनेता लगायत चलचित्र संघका केही पदाधिकारी र केही वितरक बाहेक सबै फिल्मकर्मीहरु दयाराम दहालकै पक्षमा उभिएका छन ।
यी विविध कारण र फिल्मकर्मीहरुको भनाई अनुसार बोर्डको अध्यक्षका लागि उपयुक्त उम्मेद्वार दयाराम दाहाल रहेको प्रष्ट हुन्छ । सम्बन्धित पक्ष र विभागीय मन्त्री माननीय गोकुल प्रसाद बाँस्कोटाले पनि उपयुक्त ब्यक्तीलाई नै बोर्ड अध्यक्ष बनाउने प्रतिवद्वता ब्यक्त गर्दै आएका छन । यतिखेर फिल्मकर्मीको मागपनि बोर्डमा दयाराम दाहाल नै आउन् भन्ने छ ।
केही बाहेक प्राय बोर्डका पुर्व अध्यक्षहरु, निर्माता संघका अधिकांश पदाधिकारी, चलचित्र संघका अधिकांश पदाधिकारी, निर्देशक समाज, कलाकार संघ, प्रविधिक संघ, चलचित्र पत्रकार संघका अधिकांश पदाधिकारी, जनजाती चलचित्रकर्मी संघ, संगीतकार संघ, द्वन्द निर्देशक संघ, शम्भुजित बाँस्कोटा, नीर शाह, लक्ष्मीनाथ शर्मा, हरिहर शर्मा, यादव खरेल, दिनेश डिसी, दीपकराज गिरी लगायतका दर्जनौ फिल्मकर्मीहरुले दयाराम दाहाल अध्यक्ष हुनुपर्ने धारणा राखेका छन् ।
प्रतिक्रिया