६ भदौमा ‘लभ यु हमेशा’

काठमाडौं । भाष्कर प्रधानले निर्देशन गरेको प्रेमकथामा आधारित चलचित्र ‘लभ यु हमेशा’ को फस्र्टलुक पोस्टर सार्वजनिक गरिएको छ । ६ भदौदेखि देशव्यापी हलमा प्रदर्शनमा आउन लागेको यस चलचित्रको पोस्टरमा अभिनेता यशराज गराच, अभिनेत्री ऋचा थापा र फिजा योन्जनलाई प्रस्तुत गरिएको छ ।

धर्मा क्रिएसनको ब्यानरमा यवन गुरुङको प्रस्तुति र मिलन गुरुङ सहनिर्माता रहेको यो चलचित्रमा यशराज, ऋचा र फिजाका साथै गोपाल ढकाल (छन्दे), शिशिर राणा, प्रमिला राई, पिटी योल्मा, सल्देन तामाङलगायतका कलाकारको अभिनय छ । आरआर फिल्मस्ले वितरणको जिम्मा लिएको ‘लभ यु हमेशा’ भारतको कालेबुङ, सिलगुडी तथा काठमाडौंमा छायांकन गरिएको निर्माण पक्षले जनाएको छ ।

साथै चलचित्रका केही दृश्य सिंगापुर र फिलिपिन्समा समेत खिचिएको निर्देशक भाष्करले बताए । निर्देशक भास्करको कथा रहेको यो चलचित्रको छायांकन शिव ढकाल, द्वन्द्व निर्देशन एनबी महर्जन, संगीत भासु, कोरियोग्राफी कमल राई र सम्पादन मिलन श्रेष्ठको रहेको छ ।