पाल्पाको सबै दुर्गम वडामा प्रसूति केन्द्र स्थापना

बेझाड । पाल्पाको दुर्गम र विकटमा रहेको रम्भा गाउँपालिकाका सबै वडामा प्रसूति सेवा सञ्चालनमा भएपछि सुत्केरीलाई सेवा लिन सजिलो भएको छ । स्वास्थ्य संस्थाको पहुँचबाट टाढा रहेका पाल्पाका महिलाहरुलाई गाउँपालिकाका पाँच वटै वडामा प्रसूति केन्द्र सञ्चालनमा आएपछि ठूलो राहत मिलेको छ । त्यहाँ प्रसूति सेवा नहुँदासम्म जिल्ला सदरमुकाम तानसेन जानुपर्ने बाध्यता थियो ।

गाउँपालिकालाई शून्य होमडेलिभरी पालिका बनाउन जनप्रतिनिधिको पहलमा सबै वडामा प्रसूति सेवा केन्द्र स्थापना गरिएको हो । चालू आर्थिक वर्षको साउनयता ८२ सुत्केरी भएकोमा ७८ ले स्वास्थ्य संस्थामा पुगेर बच्चा जन्माएको रम्भा गाउँपालिका स्वास्थ्य शाखा सहसंयोजक शिवप्रसाद अर्यालले बताए । करीब ९५ प्रतिशत गर्भवती सुरक्षित किसिमबाट स्वास्थ संस्थामा पुगेर सुत्केरी भएको पाइएको छ । यसलाई शतप्रतिशत पुर्याउन गाउँपालिकाले स्वास्थ्य सचेतना कार्यक्रम सञ्चालन गरिरहेको छ ।

गाउँपालिकामा संस्थागत सुत्केरी बढाउन स्वास्थ्य संस्थामा नै पुगेर बच्चा जन्माउने महिलालाई प्रोत्साहन स्वरुप रु एक हजार ५०० रकम प्रदान गरिएको गाउँपालिका अध्यक्ष विष्णुप्रसाद भण्डारीले बताए । गर्भवती तथा सुत्केरीलाई स्वास्थ्य सेवाको पहुँच बढाउन प्रत्येक वडामा गर्भवती तथा सुत्केरीको तथ्याङ्क सङ्कलन, वस्तुस्थितिको अध्ययन र योजना निर्माण गरिएको छ ।

यसैगरी पूर्ण पोषण र बालमैत्री गाउँपालिका घोषणाका लागि गाउँपालिकाले तयारी गरिरहेको छ । पूर्ण पोषणयुक्त गाउँपालिका घोषणाका लागि महिला स्वास्थ्य स्वयंसेविका, सहयोगी सहजकर्ता तथा अन्य सरोकारवालाई तालीम प्रदान गरिएको छ ।

वृद्धा कालीगण्डकीमा बेपत्ता

रामपुर नगरपालिका ६ तालपोखरा बस्ने एक वृद्धा कालीगण्डकीमा बेपत्ता भएका छन् । ६७ वर्षीया कमला भण्डारी आइतबार रामपुर ६ स्थित तातोपानीघाटको झोलुङ्गे पुल नजिकैको कालीगण्डकीको किनाराबाट हाम फालेर बेपत्ता भएको इलाका प्रहरी कार्यालय रामपुरका प्रमुख भूपालसिं रानाले जानकारी दिए । नदीमा बेपत्ता भण्डारीको प्रहरी र स्थानीयवासी, आफन्तले खोजी गरिरहेका छन् ।

यसैबीच कालीगण्डकीमा नुहाउने क्रममा एक युवा बेपत्ता भएका छन् । आइतबारको समयमा चापाकोट नगरपालिका १ स्थित कालीगण्डकीमा नुहाउन गएका वर्ष १६ का चितवन कालिका नगरपालिका घर भएका केशवप्रसाद चेपाङ बेपत्ता भएको हो । नदीमा नुहाउने क्रममा चिप्लिएर बेपत्ता चेपाङको खोजी कार्य जारी रहेको प्रहरी चौकी चापाकोटका प्रमुख जगदीश तिमिल्सनाले जानकारी दिए ।