अर्थबजार

पर्यटक आकर्षणको केन्द्र अन्तु

सौर्य अनलाइन २०७५ कार्तिक ३० गते ९:२८ मा प्रकाशित

इलाम । सूर्योदय र सूर्यास्तको दृश्यावलोकनका लागि नेपालकै प्रख्यात मानिएको पूर्वी इलामको अन्तुमा पर्यटक आगमनमा वृद्धिa भएको छ । मौसममा सुधार आएसँगै अन्तुमा आन्तरिक र बाह्य पर्यटक आउने क्रम बढेको हो । सूर्योदय, सूर्यास्त, हिमशृंखला तथा नेपाल र भारतका थुप्रै ठाउँ नियाल्न सकिने अन्तु क्षेत्र प्राचीन शासक लेप्चा जातिको लोपोन्मुख संस्कृति, कृषिबाट सुधारिएको जीवनशैली, व्यावासयिक फूलखेती, थुम्का थुम्कामा मौलाएको हरियाली चियाबारी लगायतले प्रख्यात छ । अन्तु पोखरीको सुधार गर्दै स्थानीयवासीले पोखरीमा डुंगा चलाएपछि पर्यटक थप आकर्षित भएका छन् । डुंगा सञ्चालनबाट पर्याप्त आम्दानी भइरहेको स्थानीयवासी खगराज घिमिरेले बताए ।

यस क्षेत्रको हरेक डाँडाबाट कञ्चनजंघा हिमाल, सीमापारिका दार्जिलिङ, खरसाङ, मिरिकलगायत ठाउँ नियाल्न सकिने भएकाले अन्तुले पर्यटकलाई लोभ्याएको छ । जातीय झाँकी, पुरातात्विक वस्तुको संग्रहालय, पुष्प र कृषि प्रदर्शनीले पनि पर्यटकलाई आनन्दित तुल्याएको छ । अन्तु पर्यटन विकास केन्द्रले पर्यटकलाई बस्न र घुम्नका लागि उचित प्रबन्ध मिलाएको छ । गोर्खाको सिरुबारी र लमजुङको घलेगाउ“पछि अन्तुलाई नेपाल पर्यटन बोर्डले ग्रामीण पर्यटनको सूचीमा राखेपछि पर्यटक आउने क्रम बढेको पर्यटन विकास केन्द्र अन्तुका अध्यक्ष धनकुमार आलेले बताए ।

०६० सालदेखि यहाँ निरन्तर महोत्सवको माध्यमबाट पयर्टक आकर्षण बढाउने काम भइरहेको छ । अन्तुमा पयर्टन बोर्ड, जिल्ला समन्वय समिति, सूर्याेदय नगरपालिकालगायत सरोकारवालाको सहयोगमा पोखरी मर्मत, विश्रामस्थल निर्माण र भ्यू टावर निर्माण, प्रचारप्रसारका काम हुँदै आएका छन् । भ्यूटावर निर्माणपछि यहाँबाट सूर्याेदय हेर्न दैनिक सयौँको संख्यामा पर्यटक आउने गरेका छन् । भ्यू टावरका कारण पर्यटकको आगमनमा वृद्धि भएको मेची पहाडी क्षेत्र पर्यटन प्रवद्र्धन विकास समितिका कार्यकारी निर्देशक केशव द्यौरालीले बताए ।

अन्तु पोखरीमा डुंगा सञ्चालन, खेलकूद, सांस्कृतिक र साहित्यिक कार्यक्रम नियमित सञ्चालन गरिँदै आएको छ । अन्तु र समालबुङका घरवासको समेत व्यवस्था गरिएको अध्यक्ष आलेले बताए । मेची राजमार्गको फिक्कलबाट करिब १३ किलोमिटर पूर्वको रमणीय स्थान अन्तुमा पुग्न सडक निर्माण गरिएको छ । फिक्कलको छिपिटारबाट अन्तु पुग्न सकिन्छ । पशुपतिनगर बजार हुँदै भारतीय सडक प्रयोग गर्दै छब्बिसेबाट गुफापातलको अवलोकनपछि पनि अन्तु पुग्न सकिन्छ ।

प्रतिक्रिया

पछिल्ला अपडेट्स

लोकप्रिय