विश्व

फिजीको चुनावमा सत्तारुढ दललाई बहुमत

सौर्य अनलाइन २०७५ कार्तिक ३० गते ९:०३ मा प्रकाशित

एजेन्सी, फिजी । फिजीको संसदीय चुनावमा प्रधानमन्त्री फ्रान्क बैनिमारामाको सत्तारुढ दलले स्पष्ट विजयी हासिल गरेको देखिएको छ । सन् २००६ मा सत्ता विद्रोह गरी प्रधानमन्त्री भएका ६४ वर्षीय फ्रान्कले त्यस यता भएका चुनावमा लगातार विजय हासिल गरेका छन् ।

सन् १९८७ देखि २००६ सम्म चारवटा सरकार गठन भएका र मुलुकमा अस्थिरता बढेपछि पूर्व सैनिक फ्रान्क बैनिमारामाले रक्तपातविहीन ढंगबाट सत्ता हत्याएका थिए ।

दुइतिहाई मतगणना सकिँदा बैनिमारामाको फिजीफस्र्ट पार्टीले झण्डै ५२ प्रतिशत मत प्राप्त गरेको छ । विपक्षी दल सोडेल्पा पार्टीले ३८ प्रतिशत मत प्राप्त गरेको छ भने एउटा सानो दल नेसनल फेडेरेसन पार्टीले करिब ८ प्रतिशत मत प्राप्त गरेको छ ।

फिजीको संसद् ५१ सदस्यीय रहेको छ । तर, फिजीका ससाना टापुहरूबाट मतगणनाका परिणाम प्राप्त गर्न केही दिन लाग्ने भएकाले मतगणनाको अन्तिम नतिजा प्राप्त गर्न केही दिन लाग्ने निर्वाचन आयोगले जनाएको छ ।

निर्वाचन अधिकारीहरूका अनुसार केही जिल्लामा ५३ प्रतिशत मात्र मतदान भएको छ । फिजीका केही भागमा मुसलधारे वर्षा भएकाले मतदानमा असर पुगेको थियो ।  बैनिमारामाको नेतृत्वमा रहेको फिजीको अर्थतन्त्रको मुख्य आयस्रोत पर्यटन हो । यहाँको जनसंख्या करिब ९ लाख २० हजार मात्र छ ।

उनले फिजीको वैदेशिक नीतिमा परिवर्तन गरी अस्ट्रेलिया र न्युजिल्यान्ड माथिको निर्भरता तोडेका छन् । पछिल्ला वर्षमा फिजीमा चीनको लगानी बढेको छ ।

दक्षिण प्रशान्त महासागरीय क्षेत्रका देशहरूमध्ये फिजी सबैभन्दा बढी जनसंख्या भएको र आर्थिक रूपमा शक्तिशाली छ । व्यवसाय र कूटनीतिक दृष्टिबाट फिजीले क्षेत्रीय महत्व हासिल गर्न थालेको छ ।

प्रतिक्रिया

पछिल्ला अपडेट्स

लोकप्रिय