खोजखबर

‘दोषीलाई उन्मुक्ति नदिऔँ’

सौर्य अनलाइन २०७५ कार्तिक ११ गते ६:५० मा प्रकाशित

काठमाडौं । नेपाली कांग्रेसका सभापति शेरबहादुर देउवाले बलात्कारपछि हत्या गरिएकी निर्मला पन्तका दोषीलाई कानुनी कारवाहीको दायरामा ल्याउन माग गरेका छन् ।

नेपाल तरुण दल स्थापनाको ६५औँ वर्षगाँठका अवसरमा पार्टी कार्यालय सानेपामा आयोजित शुभकामना आदानप्रदान एवं चियापान कार्यक्रमलाई सम्बोधन गर्दै दुई प्रहरी अधिकारीलाई बर्खास्त गरेर दोषीलाई उन्मुक्ति दिन नहुने बताए ।

‘हत्या, बलात्कारजस्ता जघन्य अपराधका दोषी महीनौँसम्म पत्ता नलाग्नु कानूनी राज्यका लागि चुनौती बनेको छ, यस्ता क्रियाकलापमा संलग्नको संरक्षणमा सरकार नलागोस, बलात्कार र हत्यामा जोसुकै संलग्न भए पनि दोषीलाई कारवाही होस’, उनको भनाई छ ।

सभापति देउवाले पछिल्ला दिन मुलुकमा बलात्कारका घटना बढेको बताउदै सरकारले घटनाको दोषीलाई कार्बाहीको दायरामा ल्याउन नसक्नुले कम्युष्टि सरकार एक बर्षमै असफल भएको दाबी गरे ।

दलका अध्यक्ष जीतजङ्ग बस्नेतले लोकतान्त्रिक मूल्यमान्यता, सुशासन, स्थिरता र विकासका लागि सङ्गठन लागिपर्ने बताए । २००७ सालमा प्रजातन्त्रको स्थापनापछि सुदृढीकरणका लागि युवा समूह सङ्गठित गर्ने क्रममा विसं २०१० कात्तिक १० गते तरुण दलको स्थापना भएको हो ।

कांग्रेसका संस्थापक नेता बिपी कोइरालाले दल स्थापना गरेका थिए । तत्कालीन प्रधानमन्त्री कोइराला विसं २०१७ पुस १ गते तरुण दलकै कार्यक्रममा व्यस्त रहेका बखत तत्कालीन राजा महेन्द्रबाट सेनाको शक्तिका भरमा ‘कू’ गरी कोइरालालाई पक्राउ गरी पञ्चायती शासन व्यवस्थाको सूत्रपात भएको थियो ।

प्रतिक्रिया