तीन देशले क्षेप्यास्त्रविरोधी अभ्यास गर्ने

सोेल, ३ जेठ । अमेरिका, जापान र दक्षिण कोरियाले उत्तर कोरियाको आणविक हतियारको चेतावनीलाई सामना गर्ने उद्देश्यकासाथ आगामी महिनादेखि दक्षिण कोरियामा संयुक्त रूपमा पहिलोपटक क्षेप्यास्त्र विरोधी अभ्यास थाल्ने सोलका अधिकारीले सोमबार बताएका छन् ।

सोलको रक्षा मन्त्रालय स्रोतका अनुसार अमेरिकी नेतृत्वको सेनाले प्रशान्त महासागरको किनारास्थित हवाईमा गर्दै आएको सामुद्रिक सुरक्षा अभ्यासक्षेत्र नजिकै पानीभित्र जुन २८ मा गरिने उक्त अभ्यासमा उत्तरले गर्नसक्ने सम्भावित क्षेप्यास्त्रहरूलाई पत्ता लगाउन तालिम दिइनेछ । तर, क्षेप्यास्त्र रोक्ने अभ्यास भने नगरिने, दक्षिण कोरियाले बताएको छ ।

सैन्य अभ्यासमा अमेरिकाले क्षेप्यास्त्रसहितको विमानलाई सामुद्रिक इलाकामा उडाएको अभिनय गर्ने छ । तालिममा सहभागी सेनाले त्यसलाई पत्ता लगाउने र निगरानी राख्ने अभ्यास गर्नेछन् , दक्षिण कोरियाली समाचार संस्था योन्यापले बतायो ।

३ देशबीच गरिन लागेको अभ्यासबारे अमेरिका, जापान र दक्षिण कोरियाको त्रिपक्षीय सैन्य बैठकका क्रममा प्रस्ताव गरिएको अधिकारीले बताए । प्योङयाङले १ महिना पहिले गरेको चौथो क्षेप्यास्त्र परिक्षण र केही गोप्यरूपमा गरिएका भनिएका हतियार परिक्षणपछि गरिएको एउटा रकेट प्रक्षेपणपछि संयुक्त राष्ट्रसंघलगायत विश्व समुदायले उत्तरका लगातारका हतियार परिक्षणप्रति चासो व्यक्त गरेको छ ।

यसविरुद्ध कडा कदम चालिनुपर्ने विश्व समुदायले दबाब दिएपछि अहिले प्योङयाङविरुद्ध आर्थिक नाकाबन्दी लगाइएको छ । वर्तमान संयुक्त राष्ट्रसंघको संकल्प प्रस्तावले प्योङयाङलाई क्षेप्यास्त्र सम्बन्धि प्रविधिको प्रयोग गर्न निषेध गरेको छ । तर, प्योङयाङले भने उक्त प्रावधानको बर्खिलापमा गएको अप्रिलमा छोटो तथा लामो दुरीका केही सफल तथा केही असफल परीक्षणहरू गरेको थियो ।

उत्तर कोरियाले आणविक प्रविधिमा केही उल्लेख्य उपलब्धि हासिल गर्न सफल भएको भन्दै आफू अमेरिकी भूमिमा आक्रमण गर्न सक्षम रहेको दाबी गर्दैै आएको छ ।