काठमाडौं, २३ मंसिर । अख्तियार दुरूपयोग अनुसन्धान आयोगका प्रमुख आयुक्त लोकमानसिंह कार्कीले सम्मान र विधिसम्मत ढंगबाट पछिल्लो समय केहि व्यक्तिलाई अनुसन्धानको क्रममा बोलाइएको जानकारी दिँदै तीमध्ये कसैलाई पनि छापामारेर अपमान गरेर अनुसन्धानको लागि नल्याएको बताएका छन् ।
भ्रष्टाचारको आयतनलाई व्याख्या गर्न निकै कठिन हुने बताउँदै उनले आयोगले आग्रह र पूर्वाग्रहका आधारमा होइन, विधि प्रक्रिया पूरा गरेर अनुसन्धानका मूल्यमान्यताका आधारमा त्यसबाट आउने परिणामलाई सयौं पटक सोचेर मात्र कारबाहीको दायरा अघि बढाउँदै आएको बताए ।
‘विधि र विधिसम्मत हिसाबले काम गर्नका लागि म र आयोग सधैं तयार छौँ, अनुसन्धानलाई अघि बढाउने काममा कसैसँग सम्झौता गर्दिन, बरू यसको लागि कुनैपनि मूल्य चुकाउन तयार छु, देशको लागि जीवन समर्पित गरिसकेको छु’ प्रमुख आयुक्त कार्कीले भने । भ्रष्टाचारको जालोलाई तोड्न ठूलो झट्का, जोड र अदम्य साहसको आवश्यकता रहेको उनले बताए ।
भ्रष्टाचारविरुद्धको अन्तर्राष्ट्रिय दिवसका उपलक्ष्यमा बुधवार आयोगको केन्द्रीय कार्यालय टङ्गालमा आयोजित कार्यक्रमलाई सम्बोधन गर्दै उनले भने, ‘भ्रष्टाचार हल्काफूल्का झट्काबाट अन्त्य हुन सक्दैन, यसका लागि ठूलो झड्का, ठूलै जोड र अदम्य साहसको आवश्यकता पर्दछ ।’
मुलुकमा नेपाली जनताले अपेक्षा गरेअनुरूपको अनुसन्धानको कार्य अघि बढिसकेकाले त्यो नरोकिने बताउँदै उनले भने, ‘त्यसका लागि जुनसुकै चुनौती र परिणति सहन र भोग्न परेपनि म तयार छु, विवेक र काममा अडिग छु, दावाका साथ भन्छु, कसैको मानमर्दन गर्ने गलत काम गरेको छैन ।’
समाजमा विकृतिजन्य कुरा जन्माउने, आर्थिक विकासको अनुभूति प्राप्त हुन नदिने मुख्य कुरा भ्रष्टाचार, सामाजिक भेदभाव र कुशासन नै हुन् भन्दै प्रमुख आयुक्त कार्कीले राजनीतिक तहमा भएको भ्रष्टाचारको कहिले छानबिन हुन्छ भन्ने पक्षले नै आयोगले राजनीतिक तहमा अनुसन्धानमा प्रवेश गर्न खोज्दा विरोध गरेका छन्, तर आयोगले त्यसलाई कुनैपनि हालतमा नरोक्ने प्रतिबद्धता जनाए ।
राष्ट्रसेवक निजामती कर्मचारीलाई इङ्गित गर्दै उनले भने, ‘नेपाली जनतालाई जबसम्म समानरूपले सेवा र सुविधा उपलब्ध गराउन सक्दैनौँ, तबसम्म सरकारले नेपाली जनताको नाममा समन्यायिकरूपमा सेवा दिएको हो भन्न र मान्न सकिन्न ।’
प्रमुख आयुक्त कार्कीले भने, ‘अख्तियार तपाईँहरूको मित्र हो, तपाईँहरूको मनसाय राम्रो हो भने कामगर्ने क्रममा कहीँ कतै कमजोरी भएपनि डराउनु पर्दैन ।’
वैदेशिक रोजगारीमा हुने ठगीको अनुसन्धान र भूकम्पपीडितको राहत रकम वितरणको लागि आवश्यक पर्ने एकीकृत प्रतिवेदनको कामलाई प्राथमिकता दिएर आयोगले काम गरिरहेको सो अवसरमा जानकारी दिइयो ।
नेपाल सरकारका मुख्यसचिव डा. सोमलाल सुवेदीले सदाचारी भएर निष्पक्षताका साथ काम गर्ने हो भने कसैसँग नडराइ निर्भिकताका साथ कर्तव्यपालना गर्न सजग तुल्याउने बताए । नगर्नुपर्ने काम गर्ने, गर्नुपर्ने काम नगर्ने, काम पन्छाउने प्रवृत्तिले भ्रष्टाचारलाई मलजल पु¥याइरहेको बताउँदै उनले सरकारले राम्रा कुराको थालनी गरेपनि जनतामा पु¥याउन सकिएन भने त्यसको कुनै अर्थ नरहने धारणा व्यक्त गरे ।
उनले नियमनकारी निकायको भूमिकालाई प्रभावकारी तुल्याउन तथा अख्तियार दुरूपयोग अनुसन्धान आयोगलाई बलियो बनाउन थप सहयोग गर्नुपर्ने खाँचो रहेको बताए ।
सो अवसरमा प्रमुख निर्वाचन आयुक्त कार्कीले जहिलेसुकै पनि र जहाँबाट पनि भ्रष्टाचारसम्बन्धी घटनाको सूचना दिनसक्ने गरी तयार गरिएको मोबाइलको स्वीच थिचेर सेवा शुभारम्भ भएको घोषणा गरेका थिए ।
मध्य तराईका आठ जिल्लामा हँुदै नभएका विद्यालयको नाममा बर्सेनि विनियोजन हँुदै आएको ५ अर्ब रुपैयाँ भन्दाबढी रकम आयोगको अनुसन्धानपछि दुरूपयोग हुनबाट रोकिएकोसमेत जानकारी गराइएको थियो ।
आयोगको वर्तमान नेतृत्वले २ सय १२ जना जनशक्तिको दरबन्दी रहेको आयोगमा दरबन्दी बढाएर एक हजार पु¥याइएको तथा आयोगमा ३० हजारको संख्यामा परेका उजुरीमध्ये ५÷७ हजारको संख्यामा कर्मचारीलाई विभागीय कारबाहीका लागि सिफारिस र ३ सय जनाको विरुद्ध मात्र मुद्दा दायर गरिएको जानकारी दिइयो ।
भ्रष्टाचार हुने मुलुकहरूको कोटीमा नेपाल अग्रणी स्थानमा रहेको छ । नेपालले भ्रष्टाचारविरुद्धको अभिसन्धिमा सन् ०११ फेब्रुअरी २३ मा हस्ताक्षर गरेको थियो । आयोगले सदाचार, निष्पक्षता र निर्भिकताको नारा दिएर काम गर्दै आएको छ ।
प्रतिक्रिया