कावासोती, ११ असार । नवलपरासीमा बोक्सीको आरोपमा एक युवकले महिलालाई कुटेका छन् ।
कोल्हुवा–८ ढेडाकी ६९ वर्षीया सोमकुमारी महतोलाई सोही ठाउँका युवक लालबहादुर थनेतले बोक्सीको आरोपमा कुटेर हात भाँचिदिएका हुन् ।
बिहीबार राति घरमा सुतिरहेकी महतोलाई ढोका खोल्न लगाइ एक्कासि हातपात गरेको सोमकुमारीका छोरा कुलबहादुर महतोले बताए ।
बोक्सीको आरोपमा कुटिएपछि थनेतलाई कारबाहीको माग गर्दै प्रहरी चौकी कोल्हुवामा उजुरी परेको छ ।
‘बोक्सीको आरोपमा कुटिएको भन्दै उजुरी आएको छ’, चौकीका इञ्चार्ज राजेन्द्र बस्नेतले भने, ‘अनुसन्धानबाट कामलाई अगाडि बढाइने छ ।’
कुटपिट गर्ने लालबहादुर थनेत भने फरार रहेको प्रहरीले जनाएको छ ।
सोमकुमारीको मध्यबिन्दु अस्पताल डन्डामा उपचार भएपछि घर फर्किएको परिवारले जनाएको छ ।
प्रतिक्रिया