चार ठूला आयोजनालाई पिडिए वार्ताको आह्वान

काठमाडौं, १४ वैशाख । लगानी बोर्डले निर्यातमूलक चार जलविद्युत आयोजनालाई आयोजना विकास सम्झौता (पिडिए) वार्ताका लागि बोलाएको छ । ९ सय मेगावाटको अरुण ३ र ९ सय मेगावाटकै माथिल्लो कर्णाली, ६ सय मेगावाटको माथिल्लो मस्र्याङ्दी २ र ६ सय ५० मेगावाटको तामाकोसी ३ जलविद्युत् आयोजनाका प्रवद्र्धक कम्पनीका प्रतिनिधिलाई बोर्डले वार्तामा बोलाएको हो ।

बोर्डका सह–सचिव मुकुन्द पौडेलले उक्त आयोजनाका प्रवद्र्धकलाई पिडिए वार्ताका लागि बोलाइएको जानकारी दिए । आगामी मेको अन्तिमसम्ममा वार्तामा आउने जानकारी पठाएको सहसचिव पौडेलले बताए । ‘हामीले वार्ताका लागि पत्र पठाइसकेका छौँ र मेको अन्तिमसम्ममा वार्ताका लागि आउने जानकारी उनीहरूले पठाएका छन्,’ पौडेलले भने, ‘बोर्डले पठाएको पिडिए मोडलमा समेत उनीहरूको सुझाव आउन बाँकी छ ।’
बोर्डले पिडिए वार्ताका लागि बोर्डका प्रमुख कार्यकारी अधिकृत राधेश पन्तको संयोजकत्वमा मूल वार्ता समिति गठन गरिसकेको छ । सार्वजनिक–निजी साझेदारी (पिपिपी) अवधारणाबारे शुक्रबार आयोजित पत्रकारसँगको छलफलमा पिपिपी मोडेलमै बोर्डका आयोजना अघि बढाउन लागिएको जानकारी उनले दिएका थिए ।
विदेशी तथा स्वदेशी लगानीकर्तालाई आकर्षित गरी आयोजना निर्माण अगाडि बढाई रोजगारी र आर्थिक विकासलाई बोर्डले विशेष ध्यान दिने प्रमुख कार्यकारी अधिकृत पन्तले बताए । ‘नेपाली र विदेशी दुवै कम्पनीलाई समावेश गरेर पिपिपी मोडेलमार्फत आयोजना अघि बढाउन लागेका छाँै,’ पन्तले भने, ‘३ हजार मेगावाटका चार आयोजनासँग पिडिएको वार्ता अघि बढाएका छौँ ।’ लाभांश वितरणलगायत विषयको भने वार्तापछि मात्र टुंगो लाग्ने उल्लेख गर्दै उनले अर्बौंको लागतमा आयोजना बनाउन लागिएकाले पिडिएमा ढिलाइ भएको बताए । पिडिए नहुँदा आयोजनाको निर्माण कार्य दुई वर्षदेखि अघि बढ्न सकेको छैन ।
बोर्डले १२ सय अर्ब बराबरका १४ आयोजना अघि बढाउन लागिएको जानकारी दिइएको थियो । जलविद्युत् क्षेत्रको पिपिपी मोडेलबारे अध्ययनरत संस्था सिआइजीका वरिष्ठ सल्लाहकार सञ्जय पौडेलले २५ भन्दा बढी देशले पिपिए निकाय स्थापना गरेको र नेपालमा पनि कानुनमै पिपिपीसम्बन्धी कानुनी व्यवस्था रहेको जानकारी दिए ।