सार्क युवा उद्यमीको अध्यक्षमा सौरभ ज्योति

काठमाडौं, ९ वैशाख । दक्षिण एसियाली राष्ट्रहरूको संगठन (सार्क) चेम्बर अफ कमर्सको युवा उद्यमी मञ्चमा नेपालका सौरभ ज्योति अध्यक्ष चयन भएका छन् ।

सार्क चेम्बर अफ कमर्सको ५७ औँ कार्यकारी बैठक तथा १८औँ साधारणसभाबाट ज्योति दुई वर्षका लागि अध्यक्षमा चयन भएका हुन् । सार्क युवा उद्यमीका अध्यक्ष सारुक मल्लिकले ज्योतिलाई आइतबार अध्यक्ष पद हस्तान्तरण गरेका थिए ।
सार्क चेम्बर अफ कमर्सको बैठकले सार्क राष्ट्रभित्रका राष्ट्रिय उद्यमीहरूको संस्थालाई समेत सदस्यता दिने निर्णय गरेको छ । बैठकमा सार्क चेम्बरको स्थापना भए पनि अन्तरदेशीय उद्यमशीलता विकासमा योगदान दिन नसकेको चिन्ता प्रकट गर्दै अन्तरदेशीय लगानी र उद्यमशीलता विस्तारमा जोड दिइएको थियो ।
सार्क कमर्सका अध्यक्ष विक्रमसिंह सिंहानीले सार्कभित्र एउटै मुद्रा निर्माण, सार्वजनिक निजी साझेदारी (पिपिपी) मोडलमा आर्थिक विकास, अन्तरदेशीय व्यापार प्रवद्र्धन, आर्थिक बौद्धिकता वृद्धिलगायतको क्षेत्रमा अग्रसर हुने बताए । सार्क क्षेत्रभित्र आर्थिक विकासका लागि सार्क विकास कोष स्थापना ग िरएको र त्योमार्फत जलस्रोतको सम्भावना भएका नेपाल, भुटानलगायत देशमा जलविद्युत्को विकासका लागि लगानी गर्न तयार रहेको अध्यक्ष सिंहानीले बताए । ‘सार्कभित्रका उद्यमीहरू जलविद्युत्को विकासका लागि तयार छन्,’ उनले भने ।