भारतीय लगानीका आयोजना बन्न नदिने माओवादी चेतावनी

काठमाडौं, ८ वैशाख । नेकपा–माओवादीले भारतीय लगानीमा निर्माण हुन लागेका चार आयोजना बन्न नदिने चेतावनी दिएको छ ।

वैद्य पक्षीय माओवादीको जलस्रोत तथा ऊर्जा विभागले शनिबार विज्ञप्ति जारी गरी उक्त चेतावनी दिएको हो । नेपाल उद्योग वाणिज्य महासंघले प्रमुख राजनीतिक दलहरूलाई स्वदेशी तथा विदेशी लगानीमा बन्ने कुनै पनि जलविद्युत् आयोजनामा वाधा, अवरोध र हड्ताल नगर्ने प्रतिवद्धता गराएको दुई हप्ता नवित्दै माओवादीले उक्त चेतावनी दिएको हो । महासंघको प्रतिवद्धता जनाउने कार्यक्रममा निमन्त्रणा गरेर पनि माओवादीका अध्यक्ष मोहन वैद्य सहभागिता भएका थिएनन् ।
भारतीय लगानीमा निर्माण हुन लागेका ९ सय मेगावाटको अरुण ३ र ९ सय मेगावाटकै माथिल्लो कर्णाली, ६ सय मेगावाटको माथिल्लो मस्र्याङ्दी २ र ६ सय ५० मेगावाटको तामाकोसी ३ आयोजनालाई बन्न नदिने चेतावनी माओवादीले दिएको हो । यी आयोजना अघि बढाउनका लागि लगानी बोर्डले केही दिनअघि मात्र आयोजना विकास सम्झौता (पिडिए) अगाडि बढाउनका लागि बोर्डका प्रमुख कार्यकारी अधिकृत राधेश पन्तको संयोजकत्वमा समिति गठन गरेको थियो । सरकारले आयोजना अघि बढाउने प्रक्रिया अघि बढाइरहेको बेला माओवादीले उक्त चेतावनी दिएको हो । माओवादीले पञ्चेश्वर, सप्तकोसी उच्च बाँधसमेत निर्माण हुन नदिने उल्लेख गरेको छ । यी आयोजनाहरूको भारतमा विद्युत् निर्यात हुने गरी निर्माण हुन लागेकोले नेपालको हित नहुने भन्दै विरोध गरिएको माओवादीले जनाएको छ ।