पिडिए गर्न वार्ता समिति

काठमाडौ : लगानी बोर्डले निर्यातमूलक चार जलविद्युत् आयोजनासँग आयोजना विकास सम्झौता (पिडिए) वार्ताका लागि मूल वार्ता समिति गठन गरेको छ ।
बोर्ड अध्यक्ष एवं मन्त्रिपरिषद्का अध्यक्ष खिलराज रेग्मीको अध्यक्षतामा मंगलबार बसेको बैठकले समिति गठन गरेको हो । बैठकले नौ सय मेगावाटको अरुण–३ र नौ सय मेगावाटकै माथिल्लो कर्णाली, ६ सय मेगावाटको माथिल्लो मस्र्याङ्दी–२ र ६ सय ५० मेगावाटको तामाकोसी–३ आयोजनासँग पिडिए वार्ताका लागि बोर्डका प्रमुख कार्यकारी अधिकृत राधेश पन्तको संयोजकत्वमा वार्ता समिति गठन गरेको हो । चारवटै आयोजना भारतमा विद्युत् निर्यात गर्ने उद्देश्यले बनाउन लागिएका हुन् । पिडिए नहुँदा यी आयोजनाको निर्माण कार्य दुई वर्षदेखि अघि बढ्न सकेको छैन । सह–सचिवस्तरीय वार्ता टोलीमा विद्युत् विकास विभागका महानिर्देशक अनुपकुमार उपाध्याय, ऊर्जा मन्त्रालयका केशवध्वज अधिकारी, अर्थ मन्त्रालयका बैकुण्ठ अर्याल, कानुन मन्त्रालयको एक प्रतिनिधि र बोर्डका मुकुन्द पौड्याल सदस्य छन् ।
चार आयोजनासँग वार्ताका लागि बैठकले बाटो खोलेको र तत्काल उनीहरूसँग वार्ता गरिने संयोजक पन्तले जानकारी दिए । ‘बोर्डले अन्तर्राष्ट्रिय दातृ समुदाय, बहुराष्ट्रिय निकायका साथै स्वयं आयोजना विकासकर्ताहरूसमेतका टिप्पणीलाई समेटेर तयार पारिएको पिडिएबारे आयोजना प्रवद्र्धक कम्पनीका प्रतिनिधिसँग निर्णायक वार्ता गर्नेछ,’ उनले भने, ‘वार्ता गरेर टुंग्याउन महिनौँ लागे पनि एउटा निष्कर्षमा हामी पुग्छौँ ।’ (सौस)