प्रहरी पिट्ने तीन युवा पक्राउ

काठमाडौं, २९ कात्तिक । काठमाडौंमा गस्तीमा रहेको प्रहरीलाई कुटपिट गर्ने तीन जना युवालाई प्रहरीले पक्राउ गरेको छ ।
मंगलबार राति गस्तीमा खटिएको प्रहरी टोली माथि हातपात गर्ने काठमाडौं महानगरपालिका–१५ बस्ने २१ बर्षीय समिन पाण्डे, २० बर्षीय राम पाण्डे र डल्लु बस्ने दोलखा जिल्ला घर भएका २१ बर्षीय टीकाबहादुर बुढाथोकीलाई पक्राउ गरेको प्रहरीले जनाएको छ । उनीहरुको साथबाट प्रहरीले धारिलो हतियार खुडा पनि बरामद गरेको छ ।
विजेश्वरी गीतामाता स्कूल नजिक महानगरीय प्रहरी प्रभाग स्वयम्भूबाट खट्टिएका प्रहरी हवल्दार ठूलो कान्छा पहरी कमाण्डको टोलीलाई उनीहरुले हातपात गरेका हुन् ।
स्थानीय युवाबीच भएको झगडा छुट्याउन खोज्दा उनीहरुले प्रहरी माथि हातपात गर्नुका साथै धारिलो हतियार प्रहार गरेका थिए । हवलदार पहरीको हातमा चोट लागेको छ ।
प्रहरी जवान जयप्रकाश यादवको शरीरमा निल डाम हुने गरेर युवाहरुले कुटपिट गरेको प्रहरी भनाई छ ।