लुटेराले गोली प्रहार गर्दा दुई घाइते

मकवानपुर, १६ कात्तिक । मकवानपुरमा लुटेराहरुले गोली प्रहार गर्दा फापरवारी–६ मा दुई जना घाईते भएका छन् ।
घाइते हुनेमा स्थानीय २० बर्षीय प्रदीप थिङ र ४३ बर्षीय बुद्धिमान स्याङतान रहेका छन् । सोही ठाउँ बस्ने ३५ बर्षीय मीनबहादुर लोपचन समेतका ४÷५ जनाले गंजबहादुर थिङको घरमा बुधबार राति लुटपाट गर्नेक्रममा प्रतिकार गर्दा आक्रमण भएको प्रहरीले जनाएको छ ।
लुटेराले कानमा लगाएको १ तोला सुन, मोवाइल १ थान लुटपाट गर्नुको साथै प्रदीप थिङ र बुद्धिमान स्याङतानलाई सानो हतियारबाट गोली प्रहार गरेका थिए ।
छातीमा गोली लागेका स्याङतान र घुडामा गोली लागेका थिङलाई उपचारका लागि हेटौडा अस्पताल लगिएको छ । घटनास्थलबाट प्रहरीले ९ एमएम लेखेको जंगी गोली १ राउण्ड र खोका १ थान समेत बरामद भएको छ ।
घटनाका शंकास्पद पदमपुरी–१ बस्ने २३ बर्षीय कार्साङ लामालाई प्रहरीले नियन्त्रणमा लिएको छ । बाँकी लुटेरा फरार रहेका छन् ।