सरकारले २० वर्षेसरकारले ‘सगरमाथा वृक्षारोपण महाअभियान’ सञ्चालन गर्ने

काठमाडौं । सरकारले २० वर्षे ‘सगरमाथा वृक्षारोपण महाअभियान’ सञ्चालन गर्ने भएको छ । वन तथा वातावरण मन्त्रालयले शुक्रबार पत्रकार सम्मेलन आयोजना गर्दै मन्त्रीपरिषद्को निर्णयअनुसार सन् २०२५ देखि सन् २०४५ सम्म हरेक वर्ष असार १४ देखि साउन १५ सम्म नेपालभर उपयुक्त जग्गामा वृक्षारोपण गर्ने जनाएको हो ।

पत्रकार सम्मेलनमा वन तथा वातावरणमन्त्री ऐनबहादुर शाही ठकुरीले नेपालले सन् २०४५ सम्म कार्बन उत्सर्जन शून्य गर्ने अन्तरर्राष्ट्रिय प्रतिबद्धता गरेअनुसार उक्त अभियान सञ्चालन गर्न लागिएको जानकारी दिए । महाअभियान अन्तर्गत मुलुकभर स्थानीय परम्परागत र फलफूलजन्य बिरुवा रोपण गरिने मन्त्री ठुकरीले बताए ।

मन्त्री शाहीका अनुसार महाअभियानमा संघीय मन्त्रालय प्रदेश सरकार, स्थानीय सरकार, वन क्षेत्रमा क्रियाशील सामुदायिक, साझेदारी तथा निजी वनका महासंघ, निजी क्षेत्र, नागरिक समाज र सञ्चार क्षेत्रलगायत सबै सरोकारवालाहरु सहभागी हुने जानकारी दिए ।

महाअभियानले कार्बन उत्सर्जन न्यूनीकरण र अनुकूलनमा योगदान पुर्‍याउने, हिमालय र त्यसको जलाधार क्षेत्रको संरक्षण गर्ने तथा वातावरणीय पुनःस्थापना र जैविक विविधता प्रवर्द्धन गर्ने लक्ष्य राखेको छ । अभियानले वातावरणीय समृद्धि तथा जलवायु संकट समाधान गर्न योगदान पुर्‍याउने विश्वास लिएको मन्त्रालयले जनाएको छ ।