ललितपुर । गोदावरी नगरपालिका वडा नं ११ चापागाउँमा आधारभुत चित्रकला तालिम शुरु भएको छ । योङ पिकासो अ कम्युनिटी स्कुल अफ फाइन आर्टको आयोजना तथा सो वडाको सहकार्यमा वडा भित्रका किशोरकिशोरी तथा युवाहरुको सीप विकासका लागि आइतबारदेखि सात दिने तालिम सुरु भएको हो । गोदावरी ११ का वडाध्यक्ष नीलबहादुर देशारले चित्रकलामार्फत आफूहरुले वडावासीलाई राष्ट्रका साथै अन्तरराष्ट्रिय रुपमा अघि बढाउने योजना अनुरुप उक्त कामलाई अघि बढाएको बताए । उनले भने, ‘चित्रकलाले मानिसको सोचलाई उजागर गर्ने भएकाले यसले लुकेको प्रतिभालाई बाहिर ल्याउन सहयोग गर्नेछ ।’
सो वडाका सचिव पूर्ण महर्जनले कला बिना मानिस रहन नसक्ने भएको धारणा राख्दै चित्रकारको भविष्य अतिनै राम्रो भएकाले सो तवरको व्यक्ति उत्पादन गर्नु वडाको दायित्व भएको बताए । गोदावरीका अन्य वडाभन्दा पहिला आफूहरुले उक्त काम शुरु गरेको उनले सुनाए ।
बज्रवाराही माध्यमिक विद्यालयका प्रधानाध्यापक रामेश्वर महर्जनले पुस्तकले मात्रै किशोरकिशोरीलाई सबै कुराको पूर्ण नगराउने बताउदै कला सम्बन्धि ज्ञान लिनु पनि महत्वपूर्ण विषय भएकाले चित्रकला मार्फत लुकेको प्रतिभा पाउन सकिने औंँल्याए ।
पिकासोका निर्देशक तथा चित्रकार अजय देशारले चापागाउँ मल्लकालीन समयदेखि ऐतिहासिक ठाउँ रहेको बताउँदै सो ठाउँको चित्रलाई क्यान्भासमा उर्तान सक्दा चित्रकारका भविष्यले नयाँ गति पाउने मत व्यक्त गरे । उक्त चित्रकला तालिममा कला मार्फत आफ्नो भविष्य देख्ने विभिन्न उमेर समुहका व्यक्तिहरुको सहभागिता रहेको छ ।
प्रतिक्रिया