स्वास्थ्यमा समस्या देखिएपछि भारतका उपराष्ट्रपति जगदीपले दिए पदबाट राजीनामा

नयाँ दिल्ली । भारतका उपराष्ट्रपति जगदीप धनखरले स्वास्थ्यमा समस्या देखिएपछि पदबाट राजीनामा दिएका छन् । उनले आफ्नो स्वास्थ्यलाई प्राथमिकता दिने र चिकित्सकको सल्लाह अनुसार आफ्नो पदबाट राजीनामा दिने निर्णय गरेका हुन् ।

उनले यस निर्णयमार्फत व्यक्तिगत स्वास्थ्य र भलाइमा ध्यान केन्द्रित गर्ने उद्देश्य राखेका छन् । उपराष्ट्रपति धनखरले आफ्नो राजीनामा पत्र राष्ट्रपति द्रौपदी मुर्मूलाई सम्बोधन गर्दै पठाएका हुान् ।

जसमा उनले स्वास्थ्यको ख्याल र चिकित्सकीय सल्लाहको पालना गर्दै तत्काल प्रभावबाट उपराष्ट्रपतिको पदबाट राजीनामा दिने निर्णय गरेको कुरा उल्लेख गरेका छन् ।

उनले आफ्नो पत्रमा राष्ट्रपति र प्रधानमन्त्रीको साथसाथै मन्त्री परिषद्लाई पनि उनको कार्यकालमा दिएको अमूल्य समर्थनका लागि धन्यवाद दिएका छन् ।

उपराष्ट्रपतिको रूपमा धनखरले सन् २०२२ मा पदभार सम्हालेका थिए भने उनको कार्यकाल सन् २०२५ सम्मको थियो । तर स्वास्थ्य कारणले उनले यो महत्वपूर्ण निर्णय लिनुपरेको हो ।

धनखरको राजीनामा पछि उपराष्ट्रपतिको पदको रिक्तता भर्ने उद्देश्यले नयाँ चुनाव गरिनेछ । यससम्बन्धी उपराष्ट्रपतिको सचिवालयले पनि जानकारी दिएको छ ।

उपराष्ट्रपतिको कार्यकालमा धनखरको योगदान अत्यन्त प्रेरणादायक र महत्त्वपूर्ण रह्यो । उनको कार्यकालको अवधिमा उनले देशको संविधान र संसदीय प्रक्रियामा राम्रो ज्ञान र नेतृत्व देखाएका थिए ।