काठमाडौं । केही दिनदेखि राजसंस्था पुनःस्थापित गर्ने उदेश्यले आन्दोलनमा उत्रेका राष्ट्रिय प्रजातन्त्र पार्टी (राप्रपा) का सांसदहरू र राप्रपा नेपालका अध्यक्ष कमल थापालाई सरकारले दिएको अंगरक्षक (पीएसओ) आन्दोलन नछाडेसम्म नपाउने भएका छन् ।
राप्रपा, राप्रपा नेपाल लगायत राजावादीहरुले संयुक्त प्रदर्शन सुरु गर्नु अघिल्लो दिन सरकारले उनीहरूलाई दिएका पीएसओहरू फिर्ता गरेको थियो । प्रहरी प्रवक्ता एसएसपी रमेश थापाले ब्रिफिङका लागि राजावादी दलका नेताहरूको सुरक्षामा खटिएका सबै सुरक्षाकर्मी फिर्ता गरिएका बताएका थिए ।
तर ब्रिफिङपछि पनि उनीहरूलाई फिर्ता नगरिएको हो । गृहमन्त्री रमेश लेखकले बुधबार राज्य व्यवस्था तथा सशासन समितिको बैठकमा आन्दोलन नरोकिएसम्म उनीहरूको सुरक्षामा खटिएका प्रहरी फिर्ता नहुने प्रस्ट पारेका छन् ।
प्रहरीले पूर्वउपप्रधानमन्त्री समेत रहेका राप्रपाका अध्यक्ष राजेन्द्र लिङ्देन, राप्रपाका सांसद बुद्धिमान तामाङ, राप्रपाका पूर्वअध्यक्ष एवं सांसद पशुपति शमशेर राणा, पूर्वमन्त्री एवं सांसद दीपक सिंह, पूर्वमन्त्री एवं सांसद विक्रम पाण्डे, राप्रपाका प्रमुख सचेतक ज्ञानेन्द्रबहादुर शाही, पूर्वप्रहरी महानिरीक्षकसमेत रहेका राप्रपा सांसद ध्रुबबहादुर प्रधानलगायतका पीएसओ फिर्ता बोलाएको छ ।
पूर्वगृहमन्त्रीसमेत रहेका राप्रपा नेपालका अध्यक्ष कमल थापाको पीएसओ पनि फिर्ता बोलाइएको छ । राजतन्त्र पक्षधर नेताहरूको लागि खटाइएका सुरक्षाकर्मी राजतन्त्रको पक्षमा आन्दोलन गर्न छोडेसँगै पुनः खटाइने गृहमन्त्री लेखकले बताए ।
बैठकमा राष्ट्रिय प्रजातन्त्र पार्टीका सांसद बुद्धिमान तामाङले राप्रपाका नेताहरूको सुरक्षार्थ खटिएका सुरक्षाकर्मी किन फिर्ता बोलाइएको हो ? भन्दै प्रश्न गरेका थिए ।
जवाफमा गृहमन्त्री लेखकले आन्दोलनमा सुरक्षा दिनुपर्ने भएकाले व्यक्तिगत सुरक्षार्थ खटिएका सुरक्षाकर्मीहरूलाई फिर्ता बोलाएर आन्दोलनमा खटाइएको र आन्दोलन छाड्ना साथ पुनः खटाइने बताए ।
अहिले संघीय लोकतान्त्रिक गणतन्त्रको व्यवस्था रहेको भन्दै गणतन्त्र, संघीयता, लोकतन्त्रबाट पछि फर्किने विषयले फेरि मुलुकलाई अन्धकारमा लैजाने बताए । संविधानका आधारभुत व्यवस्था उल्ट्याउने र संविधान फाल्ने काममा कसैलाई पनि नलाग्न गृहमन्त्री लेखकले चेतावनी दिए ।
प्रतिक्रिया