प्रतिनिधिसभामा वामपन्थी नेता प्रदीप नेपालको निधनप्रति शोक प्रस्ताव पारित

काठमाडौं । प्रतिनिधिसभाको आजको बैठकले पूर्वमन्त्री एवं वामपन्थी नेता प्रदीप नेपालको निधनप्रति शोक प्रस्ताव पारित गरेको छ । सभामुख देवराज घिमिरेले प्रस्तुत गरेको शोक प्रस्तावलाई बैठकको सर्वसम्मतले पारित गरेको हो ।

बैठकले स्व नेपालको निधनप्रति शोक व्यक्त गर्दै श्रद्धाञ्जली अर्पण गर्नुका साथै परिवारजनमा गहिरो समवेदना प्रकट गरेको छ । प्रतिनिधिसभा सदस्यहरुले शोक व्यक्त गर्दै एक मिनेट मौन धारणा गरेका थिए ।

वामपन्थी नेपाल नेपाली राजनीतिको एक महत्त्वपूर्ण व्यक्तित्व, नेपालको लोकतान्त्रिक आन्दोलनका अथक योद्धा तथा साहित्यकार थिए । उनको ७१ वर्षको उमेरमा काठमाडौंको नर्भिक अस्पतालमा उपचारका क्रममा मंगलबार निधन भएको थियो ।

उनी पहिलो पटक नेपाल कम्युनिष्ट पार्टी (एमाले) को तर्फबाट २०५० सालमा राष्ट्रियसभामा निर्वाचित भएका थिए । उनी विसं २०५६ मा काठमाडौं जिल्ला क्षेत्र नं १ बाट प्रतिनिधिसभा सदस्यमा निर्वाचित भएका थिए ।