‘बलिदान’को प्रि–टेजर

काठमाडौँ । आगामी दसैँमा प्रदर्शन तयारीमा रहेको चलचित्र ‘बलिदान’को प्रि–टिजर सार्वजनिक गरिएको छ । चलचित्रका मुख्य अभिनेता समीर भट्टको बुधबार परेको जन्मदिनको अवसर पारेर टिजर ल्याइएको हो । प्रि–टिजरमा अभिनेता भट्ट दमदार एक्सन दृश्यसहित प्रस्तुत भएका छन् । जहाँ देशभक्तिपूर्ण भावनाले भरिएको न्यारेशन सुन्न सकिन्छ । ‘देशको चिन्ता । माटोले खोज्दै छ जसलाई, जन्माइन आमाले उसलाई । रगत उम्लियो जसको । आमाको पिर, यो देशको शिर, कहिल्यै झुक्न नदिने सपुत हुँ म’ टिजरमा भनिएको छ ।

समीरको आक्रोशपूर्ण चिच्याहटले दृश्यलाई अझ प्रभावशाली बनाएको छ । चलचित्र सन्तोष सेनले निर्देशन गरेका हुन् । चलचित्रमा समीरका अलवा सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायतका कलाकारको अभिनय छ । ‘आसुसेन चलचित्रस् प्रालिको प्रस्तुति रहेको चलचित्रका निर्माता पवन ब्राडफोर्ड बिस्ट हुन् भने प्रेम पुरी कार्यकारी निर्माता रहेका छन् ।