सुदूरपश्चिम विश्वविद्यालयमा ३७६ जना विद्यार्थी दीक्षित हुँदै

महेन्द्रनगर । सुदूरपश्चिम विश्वविद्यालयमा आगामी आइतबार ३७६ जना विद्यार्थी दीक्षित हुने भएका छन् । विश्वविद्यालयले कञ्चनपुरको महेन्द्रनगरमा पत्रकार सम्मेलनको आयोजना गरी आगामी वैशाख ९ गते हुने चौथो दीक्षान्त समारोहको तयारी अन्तिम चरणमा पुगेको जानकारी गराएको छ ।

सुदूरपश्चिम विश्वविद्यालयका परीक्षा नियन्त्रक अनुराधा रोकायाले कूल एक हजार ३३७ विद्यार्थीमध्ये ३७६ जना प्रत्यक्ष दीक्षित हुने जानकारी दिइन् । उनले यो पटक अनलाइनबाट पनि फारम संकलन गरेको बताइन् । ‘विद्यार्थीको सहजताका लागि अनलाइन फारम भर्ने व्यवस्था गरेका थियौँ’, उननले भनिन्, ‘अहिले आवश्यक तयारी भइरहेको छ ।’

सुदूरपश्चिम विश्वविद्यालयका एवम् प्रधानमन्त्री कुलपति पुष्पकमल दाहाल ‘प्रचण्ड’ को अध्यक्षतामा हुने दीक्षान्त समारोहमा भारतको कुमाउ विश्वविद्यालयका कुलपति दिवानसिंह रावतको प्रमुख आतिथ्यता रहने विश्वविद्यालयले जनाएको छ । दीक्षान्त समारोहमा शिक्षा विज्ञान तथा प्रविधिमन्त्री सुमना श्रेष्ठलगायत विशिष्ट व्यक्तिहरूको सहभागिता रहनेछ ।

सुदूरपश्चिम विश्वविद्यालयका निमित्त उपकुलपति कर्णबहादुर थापाले समयमै दीक्षान्त समारोह हुने गइरहेको बताए । व्यवस्थापन संकाय केन्द्रीय क्याम्पस स्नातकोत्तर तहका विद्यार्थी हेमन्त भट्टलाई चान्सलर र केन्द्रीय क्याम्पस इन्जिनियर संकाय स्नातक तहका नवीनप्रसाद भट्टलाई भाइस चान्सलर पदक पाउने भएको विश्वविद्यालयले जनाएको छ ।– रासस