निसीखोला गाउँपालिका अध्यक्ष घर्तीमाथि लागुऔषधसम्बन्धी कसुर ठहर

आफू निर्दोष भएको अध्यक्ष घर्तीको दाबी

ढोरपाटन । बागलुङको निसीखोला गाउँपालिका अध्यक्ष सूर्यबहादुर घर्तीमाथि लागेको लागुऔषध गाँजा र चरेससम्बन्धी कसुर ठहर भएको छ । निसीखोला गाउँपालिका–६ का तत्कालीन वडाध्यक्ष हुँदा विसं २०७७ असार १२ गते ८० केजी गाँजासहित आफ्नै घरबाट पक्राउ परेका घर्तीमाथि लागेको कसुर ठहर भएको हो ।

जिल्ला अदालत बागलुङका न्यायाधीश दिवाकर भट्टको इजलासले घर्तीमाथि लागेको कसुर ठहर गर्दै सजाय निर्धारणका लागि पेस गर्न आदेश दिएको जिल्ला अदालत बागलुङका श्रेस्तेदार सूर्यप्रसाद भण्डारीले बताए । जिल्ला प्रहरी कार्यालय बुर्तिबाङका प्रहरी निरीक्षक प्रकाशसिंह भण्डारीको नेतृत्वमा खटिएको टोलीले घर्तीलाई पक्राउ गरेको थियो ।

बुर्तिवाङ बजारमा गाँजा खाने युवालाई समात्ने क्रममा ‘सप्लाइर्’ गर्ने व्यक्तिको खोजी गर्ने गर्दै जाँदा प्रहरी घर्तीसम्म पुगेको थियो । उनको घरबाट बरामद भएको गाँजा धुलो पारिएको अवस्थामा भेटिएको थियो । जिल्ला प्रहरी कार्यालय बागलुङले अनुसन्धान गरी विसं २०७७ भदौ ४ गते जिल्ला अदालत बागलुङमा लागुऔषध गाँजा–चरेस–नियन्त्रण ऐन, २०३३ सम्बन्धी मुद्दा दर्ता भएको थियो ।

म निर्दोष छु : अध्यक्ष घर्ती

यता निसीखोला गाउँपालिकाका अध्यक्ष सूर्यबहादुर घर्तीले आफू निर्दोष भएको दाबी गरेका छन् । सौर्य अनलाइनसँग कुरा गर्दै अध्यक्ष घर्तीले हाल आफू गाउँमा रहेको र अदालतले गरेको फैसलाबारे स्पष्ट जानकारी नभएको बताए ।

गाउँपालिकामै आफू विभिन्न कार्यमा व्यस्त रहेको र जिल्ला अदालतले के–कस्तो फैसला गर्यो भन्नेमा जानकार नभएको उनले बताए ।

‘म गाउँपालिकामै व्यस्त छु’, अध्यक्ष घर्तीले भने, ‘काम गर्नेको खुट्टा तान्ने चलन हाम्रो समाजमा चलेकै हो, जिल्ला अदालतले कस्तो फैसला गर्यो त्यो त मलाई थाहा छैन ।’ साथै, उनले आफू नेपाली कांग्रेसबाट चुनाव जितेर गाउँपालिकाको अध्यक्ष बनेको जानकारी दिए ।

प्रतिक्रिया