ललितपुर । ललितपुरमा ‘स्वस्थ र स्वस्थ महिनावारी तपाईं हाम्रो रखवारी विषयक अन्तरक्रिया’ कार्यक्रम सम्पन्न भएको छ ।
आइतबार ललितपुर महानगरपालिकाका महिला जनप्रतिनिधिहरुले महिला स्वास्थ्य र वातावरण स्वास्थ्यलाई ध्यानमा राखेर पुनः प्रयोग गर्न मिल्ने प्याडको प्रयोग बढाउनुपर्नेमा जोड दिएका छन् ।
एक्सपोज नेपालले गरेको अन्तरक्रिया कार्यक्रममा महिला जनप्रतिनिधिले केमिकलयुक्त प्याडको सट्टा पुनः प्रयोग गर्न मिल्ने कपडाको प्याड प्रयोग गर्ने बानीको विकास गर्नुपर्नेमा जोड दिए ।
कार्यक्रममा ललितपुर महानगरका २९ वटै वडाका महिना जनप्रतिनिधिको सहभागिता थियो । उक्त कार्यक्रममा महानगरकी उपप्रमुख मञ्जिला शाक्य बज्राचार्यले पुनः प्रयोग गर्न मिल्ने प्याड बनाउने उद्योग को प्रवर्द्धन गरी त्यसको प्रयोग बढाउनुपर्ने बताइन् ।
उनले महानगरपालिकाले यस्तो प्याड बनाउने तालिम प्रदान गरी महानगरभित्रै उत्पादन बढाइ देशबाहिरबाट हुने केमिकलयुक्त प्याडको आयात रोक्न सकिने बताइन् । उपप्रमुख बज्राचार्यले यसका लागि ललितपुर महानगरपालिकाले योजना नै बनाएर काम गर्ने प्रतिबद्धता व्यक्त गरिन् ।
महिनावारी स्वास्थ्य र पुनः प्रयोग गर्न मिल्ने सजिलो प्याडको उत्पादनमा काम गरिरहेको एक्सपोज नेपालसँग महानगरले सहकार्य गर्ने उनको जोड थियो ।
एक्सपोज नेपालका अध्यक्ष ज्ञान मर्हजनले महिलाहरुको स्वास्थ्य र आर्थिक पाटोलाईसमेत ध्यानमा राखेर महिलाहरुलाई सजिलो प्याड बनाउने तालिम प्रदान गर्दै आइरहेको जानकारी दिए ।
उनले सुति, फ्लाटिनका कपडाबाट स्वस्थकर लिकेज नहुने र टिकाउ, कम खर्चिलो प्याड बनाउन सकिने तथा कपडा र त्यसमा प्रयोग भएका सामग्रीको गुणस्तर मापन गरेर मात्र प्रयोगका लागि बजारमा पठाउने गरिएको बताए ।
कार्यक्रममा बोल्दै महिला वडा सदस्यहरुले प्रत्येक वडा–वडामा यस्तो तालिम सञ्चालन गरी घरघरमै प्याड उत्पादन गरेर विदेशबाट आयात हुने प्याड विस्थापन गर्नुपर्ने बताए ।
उनीहरुले स्थानीय तहले बजेट विनियोजन गरेर नै यस किसिमका तालिम सञ्चालन गर्नुपर्ने र पुनः प्रयोग गर्न मिल्ने प्याडको प्रयोग बढाउनुपर्ने बताए । वडामा स्वस्थ र स्वस्थ महिनावारीका लागि आफूहरुले भूमिका निर्वाह गर्ने उनीहरुको प्रतिबद्धता थियो ।
कार्यक्रममा जनप्रतिनिधिहरु सानु अवाले, लक्ष्मी शर्मा दाहाल, संगीता अछामी, अलिसा डंगोल, अन्जना कार्की, सरस्वती जोशी, यमुना श्रीसलगायतले आ–आफ्ना धारणा प्रस्तुत गरेका थिए ।
प्रतिक्रिया