शर्मा सम्मानित

काठमाडौं । नेपाली वाङ्मयका क्षेत्रमा योगदान दिएको भन्दै साहित्यकार डा बेञ्जु शर्मालाई सम्मान गरिएको छ । उनलाई यस वर्षका लागि नारी साहित्य प्रतिष्ठान नेपालद्वारा प्रदान गरिने ‘गोमा स्मृति सम्मान’ दिइएको हो ।

प्रतिष्ठानको वार्षिकोत्सवका अवसर पारेर शनिबार आयोजित कार्यक्रममा कवि तथा संस्कृतिविद् तुलसी दिवस तथा प्रतिष्ठानका अध्यक्ष गीता कार्कीले उक्त सम्मान प्रदान गरे । साहित्यकार गोमा शर्माको स्मृतिमा स्थापित सो पुरस्कार नेपाली साहित्यका क्षेत्रमा विशिष्ठ योगदान पुर्याउने व्यक्तिलाई प्रदान गर्ने गरिन्छ । त्यसैगरी सो कार्यक्रममा उक्त प्रतिष्ठनबाट प्रदान गरिने ‘स्रष्टा विशेष सम्मान’ रुकु कार्की र ‘मातृभूमि मायादेवी पुरस्कार’ गीता खत्रीलाई प्रदान गरिएको थियो । मायादेवी मातृभूमि पुरस्कार स्रष्टा रुकु कार्कीले आफ्नी आमा मायादेवीको स्मृतिमा स्थापना गरेकी हुन् । नेपाली साहित्य क्षेत्रमा निरन्तररूपमा लाग्ने नारी प्रतिभामध्येबाट स्रष्टाद्वय कार्की र खत्रीलाई यी पुरस्कार प्रदान गरिएको नारी साहित्य प्रतिष्ठान नेपालले जनाएको छ । यी पुरस्कारमा नगद राशिसहित सम्मानपत्र रहेको छ ।

सो कार्यक्रममा कवि तुलसी दिवसले कलाकार एवं स्रष्टाको सम्मान गर्ने संस्कारले उनीहरूलाई आफ्ना क्षेत्रमा निरन्तररूपमा लाग्न प्रेरणा मिल्ने धारणा राख्दै यस्ता कार्यलाई निरन्तरता दिनुपर्ने बताए । प्रतिष्ठानका अध्यक्ष कार्कीले नेपाली साहित्य क्षेत्रमा लागिरहेका नारीलाई आगामी दिनमा पनि निरन्तररूपमा लाग्न प्रोत्साहित गरी उनीहरूभित्र रहेको प्रतिभालाई प्रस्फुटन गराउने उद्देश्यले उक्त प्रतिष्ठानले बर्सेनि पुरस्कार तथा सम्मान प्रदान गर्ने गरेको जानकारी दिए । सो कार्यक्रममा साहित्यकार डा रामप्रसाद ज्ञवाली, रामप्रसाद दाहाल, पुरस्कृत व्यक्तित्व डा शर्मा, खत्री र कार्की लगायतले नेपाली साहित्य क्षेत्रका विविध विषयमा धारणा राखेका थिए ।