ग्रिजम्यान बार्सिलोनामा

एजेन्सी, स्पेन । एन्टोनी ग्रिजम्यान बार्सिलोना अनुबन्ध भएका छन् । स्पेनिस क्लब एट्लेटिको मड्रिडमा सफल फुटबल जीवन बिताएका उनी हाल ला लिगा च्याम्पियन बार्सिलोनामा अनुबन्ध भएका छन् ।

बार्सिलोनाले ग्रिजम्यानको रिलिज क्लज १२० मिलियन बुझाउँदै क्लबमा अनुबन्ध गरेको हो । ग्रिजम्यानलाई बार्सिलोनाको घरेलु मैदान क्याम्प नाममा प्रस्तुत गर्ने बताइएको छ ।

२८ वर्षीय फ्रान्सका स्टार खेलाडी ग्रिजम्यानले सन् २००९ मा रियल सोसिडाडबाट क्लब करियरको सुरुवात गरेका थिए । सोसिडाडमा उनले १८० लिग खेल खेल्दै ४६ गोल गरेका थिए ।

उनी सन् २०१४ मा एट्लेटिको मड्रिडमा आएका थिए । ६ वर्ष क्लबमा आबद्ध हुुनेगरी क्लब र ग्रिजमानबीच सम्झौता भएको थियो । सम्झौता अनुसार अझै एक वर्ष बाँकी रहेको थियो ।

ग्रिजम्यानले एट्लेटिको मड्रिडमा १८० लिग खेल खेल्दै ९४ गोल गरेका थिए । उनले राष्ट्रिय टोलीका लागि ७२ खेल खेल्दै २९ गोल गरेका छन् ।