उपाध्यायको ‘मधुर मिलन’ सार्वजनिक

काठमाडौं । डा. डिआर उपाध्यायको नयाँ गीत ‘हाम्रो मधुर मिलनको याद आयो…’ सार्वजनिक भएको छ । गीतमा गायक सत्यराज स्वरूपको स्वर, सागर अधिकारी ‘शरद’ को संगीत, साहस शाक्यको एरेन्ज रहेको छ । अञ्जिता कँडेलले निर्देशन गरेको गीतको भिडियोमा प्रविन बराल र स्मृति ओली फिचर्ड छन् । विनय तामाङले छायांकन गरेको भिडियोमा माधव वेल्वासको सम्पादन रहेको छ ।

केही समयअघि गीतकार डा.उपाध्यायले एकै साथ ७ गीति एल्बमका ३६ ओटा गीत एकै पटक सार्वजनिक गरेका थिए । उपाध्यायका ‘प्रणय’ ‘जखम’, ‘माउन्टेन मेलोडी’, ‘नसालु नजर’, ‘जोहो’, ‘अन्तराप’, ‘प्रतिनाद’, ‘सहेली’, ‘परिष्कृत’, ‘कृति’ र ‘पृथक’ जस्ता गीति एल्बम बजारमा आएका छन् । त्यस्तै उनका ‘अतिरिक्त’, ‘भाग्यचक्र’, ‘स्वार्थी’, ‘त्यागी’, ‘बज्रघात’, ‘अपवित्र छायाँ’, ‘बिटुली’ ‘दगाबाज’ र ‘अधुरो प्रेम’ लगायतका उपन्यास प्रकाशित छन् ।

केही दिनपहिले गीतकार संघ नेपालको नवौँ वार्षिकोत्सवमा डा.उपाध्यायलाई ‘वर्ष गीत पुरस्कार’ बाट पुरस्कृत गरिएको थियो । संघले प्रदान गर्ने ‘वर्ष गीत पुरस्कर’ यो वर्ष ‘सन्तानको शिर उठाउन हजार ठाउँ शिर झुकाउने बाबालाई बिर्सिएर…’ गीतबाट उनलाई ५१ हजारसहित सम्मान गरिएको थियो । उक्त गीतमा संगीतकार सन्तोष श्रेष्ठको संगीत र मनोज राजको स्वर रहेको छ ।