सप्तरी । सप्तरी क्रिकेट संघको आयोजनामा सप्तरी प्रिमियर लिग क्रिकेटको दोस्रो संस्करण राजविराजमा सुरु भएको छ । पब्लिक विन्देश्वरी माध्यमिक विद्यालय मैदानमा सम्पन्न उद्घाटन खेलमा डिफेन्डिङ च्याम्पियन बजाज खडक वारियर्सलाई बोदे बर्साइन थन्डर्सले ३३ रनले पराजित गरेको छ ।
पहिले ब्याटिंग गर्दै बोदे बर्साइनले दिएको १८० रनको लक्ष्य पछ्याउने क्रममा बजाज खडक वारियर्सले २० ओभर ब्याटिंग गर्दै ८ विकेट गुमाएर १४६ रन मात्रै बनाउन सक्यो । वारियर्सको लागि हरिशंकर शाहले सर्वा्धिक ४५ रन बनाए जुन क्रममा २९ बलमा ४ चौका र २ छक्का प्रहार गरे भने संसाद शेखले अविजित ३९ रन बनाउन ३७ बलमा २ चौका र २ छक्का प्रहार गरे।
वारियर्सलाई लक्ष्यसम्म पुग्न नदिन बोदे बर्साइनका कप्तान मन्जित श्रेष्ठले सर्वा्धिक २ विकेट लिए । यस्तै, सर्वन यादव, मुकुन्द यादव, मिनास थापा, ओपन राइ र पप्पु यादवले १र१ विकेट लिए । यस अघि टस हारेर ब्याटिंग गरेको बोदे बर्साइन थण्डर्सले निर्धा्रित २० ओभरमा २ विकेट गुमाएर १७९ रनको योगफल तयार गरेको थियो । उसको लागि मुकुन्द यादवले विस्फोटक इनिंग खेल्दै मात्र १५ बलमा ५ चौका र ४ छक्का मदतले अविजित ४९ रन बनाएका थिए ।
यस्तै, अमित यादवले अविजित ३४ रन बनाए जुन क्रममा २२ बलमा ३ छक्का र २ चौका प्रहार गरे । पवन दासले ३३, मिनास थापाले ३२ तथा कप्तान मन्जित श्रेष्ठले १२ रन बनाए । पहिलो विकेटको लागि मन्जित र पवन दासले ४७ रनको, दोश्रो विकेटको लागि मन्जित र मिनास बीच ६३ रनको तथा तेश्रो विकेटको लागि अमित र मुकुन्दले ६९ रनको साझेदारी गरेका थिए । बजाज खडक वारियार्सको बलिंगमा नन्दन झा र योगराज शर्माले १–१ विकेट लिए । खेलको प्लेयर अफ द म्याच मुकुन्द यादव घोषित भए ।
पहिलो खेलमा बिहान ८ बजे मेहबुब आलम कप्तानीको रुपनी राइडर्स र रोहन विक कप्तानीको तिलाठी कोइलाडीले प्रतिस्पर्धा गर्नेछन् । दोश्रो खेलमा दिउँसो १ बजे राजेश पुलामी कप्तानीको बोदे बर्साइनले पुष्प थापा कप्तानीको डाक्नेश्वरी ड्रयागनसँग प्रतिस्पर्धा गर्नेछ । प्रतियोगिताको उद्घाटन राजविराज नगरपालिकाका मेयर शम्भुप्रसाद यादवले ब्याटिङ र उपमेयर साधना झाले बलिंग तथा तिलाठी कोइलाडी गाउँपालिकाका अध्यक्ष सतिस कुमार सिंहले अम्पायरको भूमिका निर्वाह गरेका थिए । लिगमा कुल ५ टिम सहभागी रहेका छन् ।
बजाज खडक वारियर्सको मार्की खेलाडी राजेश पुलामी, रुपनी राइडर्सकाका मेहबुब आलम, बोदे बर्साइनका मञ्जित श्रेष्ठ, तिलाठी कोइलाडीका सुनिल धमला तथा डाक्नेश्वरी ड्रयागन्सका पुष्प थापा मार्की खेलाडी रहेका छन् । प्रतियोगिता सिंगल राउन्ड रोबिन फर्म्याटमा खेलाइनेछ । लिग चरणमा सबै ५ टिमले एक अर्कासँग खेल्नेछन् जसपछि अंकतालिकामा उत्कृस्ट हुने २ टिमले असार ८ गते फाइनल खेल्नेछ । लिगको विजेता टिमले २ लाख तथा उपविजेताले १ लाख रुपैयाँ प्राप्त गर्नेछ । प्रतियोगिता असार २ देखि ८ गतेसम्म सञ्चालन हुनेछ ।
प्रतिक्रिया