क्यानाडा । रहफ अल–कुनुनको कथा ट्विटरमार्फत् संसारभरिका मानिसहरूसम्म पुग्यो र हाल उनी शरण पाएपछि क्यानडामा छिन् । तर, साउदी अरेबियाबाट विगतमा पनि युवतीहरू सुखद् भविष्यको खोजीमा भागेर विदेश गएका थिए जसको चर्चा यसअघि भएको थिएन ।
रहफको अवस्थाका कारण साउदी अरबमा महिला अधिकारको स्थिति विषयमा बहस चर्किँदै गर्दा क्यानडा पुगेकी अर्की युवतीले आफ्नो कथा बिबिसी विश्व सेवासँग भनेकी छन् । चौबीस वर्षीया साल्वा आफ्नी १९ वर्षीया बहिनीसँग आठ महिनाअघि भागेकी थिइन् । उनीहरू क्यानडाको मोन्ट्रियल नगरमा बस्छन् ।
उनको कथा उनकै शब्दमाः
भाग्ने तयारी कसरी भयो ?
हामी करिब ६ वर्षअघि देखि नै भाग्ने तयारीमा थियौँ । तर, हामीसँग राहदानी वा राष्ट्रिय परिचयपत्र थिएन । मलाई ती कागजात बनाउन बुवाआमाको अनुमति चाहिन्थ्यो । (साउदी महिलाहरूलाई धेरै काम गर्न आफ्ना पुरुष आफन्तको अनुमति चाहिन्छ ।)
म विश्वविद्यालयमा पढ्दा मेरा अभिभावकले राष्ट्रिय परिचयपत्र बनाइदिएका थिए । त्यसैकारण म केही भाग्यमानी भएँ । दुई वर्षअघि अंग्रेजीको परीक्षाको लागि भनेर मेरो राहदानी पनि बनाइएको थियो । तर, मेरो परिवारले त्यो खोसिदियो । पछि मैले फेरि त्यो हात पार्न सफल भएँ ।
मैले मेरो दाजुको घर छिर्ने साँचो चोरेर बजारमा गएर अर्को नक्कली साँचो बनाएँ । म घरबाहिर निस्कन उनीहरूको अनुमति थिएन । तर, म उनीहरू सुतेको वेला भागेँ । त्यो निकै जोखिमपूर्ण काम थियो किनभने म समातिएकी भए उनीहरूले मलाई कुटपिट गर्ने थिए ।
मैले नक्कली साँचो बनाएपछि मेरो र बहिनीको राहदानी अनि बुवा सुतेको वेला उहाँको फोन लिन सफल भएँ । त्यसपछि मैले गृह मन्त्रालयको वेबसाइटमा गएर उनको नम्बरलाई मेरो नम्बरमा बदल्न सफल भएँ । त्यसपछि मैलै उनको एकाउन्टमा लग इन गरेर हामीलाई देश छोड्ने अनुमति पनि लिन सफल भएँ ।
सबै जना सुतेको वेला हामी रातिको समयमा घर छोड्न सफल भयौँ । त्यो एकदमै तनावपूर्ण क्षण थियो । हामीले कार चलाउन नसक्ने भएकोले एउटा ट्याक्सी बोलायौँ । भाग्यवश साउदी अरेबियाका सबैजसो ट्याक्सी चालक विदेशी हुने हुनाले हामीले एक्लै यात्रा गरेकोमा कसैले शंका गरेनन् ।
त्यसपछि हामी रियादको राजा खालिद अन्तर्राष्ट्रिय विमानस्थलमा गयौँ । हामीले के गर्दैछौँ भनेर यदि कसैले थाहा पाएको भए सम्भवतः हामी मारिने थियौँ । म विश्वविद्यालयमा पढ्दै गर्दाको पछिल्लो वर्ष म अस्पतालमा काम गर्दथेँ । त्यतिवेला मैले केही रकम जोगाएकी थिएँ ।
मैले बेरोजगारी भत्ता बापतको रकम पनि जोगाएकी थिएँ । त्यो मलाई विमानको टिकट र जर्मनीको ट्रान्जिट भिसा लिन पर्याप्त भयो ।
त्यसपछि म बहिनीसित जर्मनी जाने विमान चढ्न सफल भएँ । म पहिलोपटक विमान चढेकी थिएँ । मलाई साह्रै रमाइलो लाग्यो । म खुसी भएँ तर डराएँ पनि ।
हामी घरमा नभएको थाहा पाएपछि बुवाले प्रहरीलाई फोन गर्नुभएछ । त्यो त्यतिवेला निकै ढिलो भइसकेको थियो । प्रहरीले बुवालाई फोन गर्न लाग्दा फोन मकहाँ आइपुग्यो किनभने मैलै सरकारी वेबसाइटमा बुवाको नम्बर नै बदलिदिएको थिएँ । जब म विमानबाट ओर्लिएँ प्रहरीले बुवालाई पठाएको सन्देश मेरो फोनमा आयो ।
विदेश आगमन कस्तो भयो ?
साउदी अरेबियाको जीवन, के जीवन ? म विश्वविद्यालय जान्थेँ अनि घर जान्थेँ। दिनभरि केही काम हुँदैनथ्यो । पुरुषहरूले मलाई चोट पुर्याउँदथे र भन्ने गर्दथे कि पुरुषहरू महिलाभन्दा ठूला हुन् । मलाई रमादान पर्वको वेला पनि प्रार्थन गर्न र केही नखाई व्रत बस्न बाध्य तुल्याउँथे ।
जब म जर्मनी पुगेँ त्यसपछि म मलाई शरण लिन आवश्यक कानुनी सहायताको लागि एक कानुनी सहायता केन्द्र पुगेँ । मैले केही फारम भरेँ र त्यसपछि उनीहरूलाई मैले मेरो कथा सुनाएँ । मैले क्यानडा नै रोजेँ । किनभने क्यानडामा मानव अधिकारलाई सम्मान गरिन्छ ।
मैले सिरियाली शरणार्थीहरू क्यानडा आएको र यहाँ शरण पाएको बारेका समाचारहरू पढेकी थिएँ । त्यसैले मैले सोचेँ क्यानडा नै म जानुपर्ने देश हो । मलाई शरण दिन क्यानडा सहमत भयो । जब म टोरोन्टो विमानस्थल आइपुगेँ मैले पर क्यानडाको झन्डा देखेँ । त्यतिवेला मलाई ठूलै कुरा प्राप्त भएको अनुभव भयो । अहिले म मेरी बहिनीसँगै मोन्ट्रियल नगरमा छु । मलाई कुनै तनाव छैन । मलाई कसैले यो गर त्यो नगर भनेर दबाब दिँदैन ।
साउदी अरेबिया धनी होला, उनीहरूसँग धेरै रकम होला तर मलाई यहाँ राम्रो लाग्छ । म आफ्नो कोठा चाहेको वेला छोड्न सक्छु । मलाई कसैको अनुमति चाहिन्न । म बाहिर जान सक्छु ।
मलाई यो कुराले एकदमै धेरै खुसी बनाउँछ । म स्वतन्त्र छु जस्तो लाग्छ । मलाई जे लगाउन मन लाग्छ म त्यो लगाउन सक्छु । मलाई यहाँको शरद ऋतुको रंग मन पर्छ । मलाई यहाँको हिउँ पनि मन पर्छ । म फ्रान्सेली भाषा सिक्दैछु । त्यो एकदमै गाह्रो छ । म साइकल चढ्न, पौडी खेल्न र आइस स्केट खेल्न पनि सिक्दैछु । म जीवनमा केही गर्दैछु जस्तो लाग्दैछ ।
म मेरो परिवारसँग सम्पर्कमा छैन । त्यो मेरा लागि राम्रो हो, त्यो उनीहरूका लागि राम्रो हो । मलाई अहिले यहीँ आफ्नो घर हो जस्तो लाग्छ । मलाई यहाँ एकदमै राम्रो छ । (बिबिसीबाट)
प्रतिक्रिया